Meta po përballet me një padi të re që e akuzon kompaninë se ka ndjekur veprimet dhe ka grumbulluar të dhënat e përdoruesve të iPhone, dhe pse në këto pajisje janë prezantuar shërbime të reja privatësie që kanë si qëllimi parandalimin e këtij fenomeni.
Në gusht të këtij viti u zbulua se përmes aplikacioneve si Facebook dhe Instagram, Meta mund të regjistrojë të gjitha klikimet e përdoruesve, tekstet e shkruara dhe më tepër, duke përdorur browser-in brenda aplikacionit.
Kur një përdorues klikon mbi një link në Instagram, për shembull, Meta mund të monitorojë ndërveprimet e tyre si teksti i përzgjedhur, teksti i shkruar (passwords apo informacionet e kartave të kreditit) brenda këtij website.
Kjo praktikë e ndjekjes së veprimeve të përdoruesve është në shkelje të drejtpërdrejtë me politikat App Tracking Transparency të Apple, të cilat kërkojnë nga aplikacionet të kërkojnë për lejen e përdoruesit para se të grumbullojnë të dhënat e tyre.
Në shumicën e aplikacioneve në iPhone, zhvilluesit përdorin Safari për të hapur një link nga aplikacioni, mirëpo Meta ka zhvilluar një browser të saj brenda aplikacionit, duke injektuar një kod JavaScript të quajtur “Meta Pixel” në të gjithë links.
Meta do të përpiqet të bëjë gjithçka është e mundur për të grumbulluar këto lloje informacionesh, pasi të ardhurat më të mëdha nga kompania sigurohen nga shitja e këtyre të dhënave për reklamime.
