Në panairin e Mobile World Congress, ku Geek Room ishte prezent së bashku me Neptun për të informuar ndjekësit me të rejat më të fundit nga bota e teknologjisë, një kompani ka tërhequr vëmendje me një qasje krejtësisht të pazakontë për smartphone-t. Oukitel prezantoi modelin e saj të ri të fortifikuar, WP63, i cili përfshin një funksion të integruar për ndezjen e zjarrit. Telefoni është krijuar për personat aventurierë, që preferojnë të kalojnë kohë të gjata në natyrë, kamping si dhe për përdorim në situate emergjente.
WP63 ka një ndezës elektrik të integruar, të fshehur nën një kapak mbrojtës në pjesën e sipërme të pajisjes. Kur aktivizohet, një spiralë elektrike nxehet, e ngjashme me çakmakët e vjetër të makinave, duke lejuar ndezjen e druve ose materialeve të tjera të djegshme pa pasur nevojë për shkrepëse apo çakmakë tradicionalë.
Por ndezja e zjarrit është vetëm një nga veçoritë ekstreme të këtij telefoni. Pajisja vjen me një bateri gjigante 20,000mAh, e cila jo vetëm garanton përdorim shumëditor, por e lejon telefonin të funksionojë edhe si power bank për pajisje të tjera përmes USB-C me karikim 18W. Ai përfshin gjithashtu një dritë të madhe kampingu, altoparlant të fuqishëm që mund të përdoret si alarm dhe një dizajn shumë të trashë e rezistent, me trashësi rreth 27 mm.
WP63 ka një ekran 6.7 inç me rifreskim 120Hz, por rezolucion 720p, dhe fuqizohet nga një procesor Unisoc T8200. Me një çmim rreth $399, Oukitel e pozicionon këtë model si pajisje të specializuar, jo si konkurrent direkt për Apple apo Samsung, por si një mjet mbijetese për kushte ekstreme dhe përdorime specifike.
