Google po fillon të nxjerrë në treg Android Safe Browsing, një shërbim i ri që u shfaq në versionin beta të Android që në tetor 2023, por nuk u prezantua asnjëherë zyrtarisht.
Safe Browsing do të identifikojë faqet e internetit të rrezikshme dhe do të paralajmërojë përdoruesit për përmbajtjen e tyre. Për herë të parë ky shërbim u zbulua nga eksperti i Android, Mishaal Rahman përmes një publikimi në X.
“Safe Browsing ju sinjalizon për kërcënimet e sigurisë, si faqet e internetit të dëmshme, kur shfletoni brenda aplikacioneve të caktuara,” shpjegon Google në faqen e Android Safe Browsing. “Për shembull, mund të merrni një sinjalizim nëse klikoni në një link në aplikacionin tuaj të lajmeve që do t’ju çonte në një sajt të njohur phishing.”
Meqenëse Android Safe Browsing është pjesë e Shërbimeve të Google Play, përdoruesit nuk duhet të kenë nevojë të përditësojnë pajisjet e tyre për të parë funksionin. Google po fillon të pajisë smartphone-t me shërbimin “Android Safe Browsing” këtë javë si pjesë e një ndryshimi, por mund të duhet pak kohë që çdo telefon Android ta marrë atë.
Për të aksesuar shërbimin në një telefon inteligjent Pixel, shkoni te Settings > Security and Privacy > More Security & Privacy dhe prekni Android Safe Browsing. Në telefonat Samsung, shkoni te Settings > Security & Privacy dhe shtypni “Android Safe Browsing“.
