Që nga tetori, Google nuk ka zbardhur shumë informacione rreth planit për të përmirësuar asistentin e tij zanor me inteligjencën e tij të fuqishme artificiale Bard. Sidoqoftë, më në fund është publikuar nga aplikacioni Pixels Tips një paraqitje e shkurtër e mënyrës se si do të funksionojë Assistant with Bard.
Demoja, e cila u shfaq në aplikacionin Pixels Tips që është i disponueshëm për shumicën e telefonave Google Pixel, na jep një pamje më të plotë të asaj që mund të bëjë Assistant with Bard.
Për shembull, në video tregohet një rast ku përdoruesit mund të ngarkojnë një fotografi të një bime dhe të kërkojnë nga Google Assistant: “Sapo e bleva këtë bimë. Më jep këshilla dhe video në YouTube për të më ndihmuar të kujdesem për të.” Bard më pas do të vazhdojë me video dhe këshilla të hollësishme për kujdesin e bimëve. Kjo ndryshon përvojën e asistentit personal që ofrohej më parë nga Asistenti aktual i Google.
Google Assistant, aktualisht funksionon kryesisht si një mjet reaktiv, duke iu përgjigjur pyetjeve dhe komandave të drejtpërdrejta. Megjithatë, integrimi me Bard-in shënon një zhvendosje drejt një kuptimi më kontekstual. Bard mund të aksesohet gjithashtu duke thënë thjesht “Hey Google” ose duke mbajtur shtypur butonin “Home“.
Sipas një postimi nga eksperti i Android, Mishaal Rahman, source code në aplikacionin Pixel Tips tregon se ndryshimi mund të vijë drejt përdoruesve në mars të këtij viti.
