Disa javë më parë, një raport zbuloi se Apple ka zhvilluar teknologji të reja të baterive për të rritur jetëgjatësinë e baterisë së produkteve të saj. Ndryshimet pritet të jenë më të mëdha, por duket se Apple do të përdorë një model të ri baterie me një kasë metalike që në iPhone 16 Pro.
Në një foto të shpërndarë nga Kosutami në X (ish Twitter), ne shikojmë për herë të parë këtë komponent që përflitet se do të jetë pjesë e iPhone-ve të vitit të ardhshëm. Sipas Kosutami, bateria e bërë leak është një prototip i “fazës së hershme” të krijuar për iPhone 16 Pro. Ka një kapacitet prej 3,355 mAh, jo shumë më tepër se bateria 3,274 mAh në iPhone 15 Pro.
Kjo bateri ka të njëjtin dizajn në formë L që Apple përdor në bateritë e saj të iPhone. Megjithatë, ndryshe nga çdo bateri tjetër iPhone, kjo është e mbuluar nga një kasë metalike në vend të mbulesës tradicionale. Meqenëse jemi një vit larg prezantimit të iPhone 16, Apple mund të anulojë planet e saj dhe të ripërdorë të njëjtin dizajn të baterisë si gjeneratat aktuale të iPhone.
Megjithatë, nëse prototipi është i vërtetë dhe bateria e re i kalon testet, mund të shohim përmirësime të rëndësishme kur bëhet fjalë për shpërndarjen e nxehtësisë. Një kasë metalike do të ndihmonte në shpërndarjen më të mirë të nxehtësisë duke shmangur përqendrimin e saj.
Vlen të përmendet se Kosutami ka një histori të mirë raportimi për sa i përket produkteve të Apple, pasi dhe raportimet e mëparshme kanë qenë të sakta. Mbetet për t’u parë nëse ky dizajn do të vijë në produktin final.
