Huawei Mate 50 Pro debutoi në Kinë më herët gjatë këtij muaji, ndërkohë që në ditën e djeshme u bë dhe lançimi për tregun ndërkombëtar. Ky smartphone vjen me një ekran të madh me një notch, kamera kryesore 50MP me teknologjinë XMAGE me aperture variabël.
Mate 50 Pro fuqizohet nga proçesori Snapdragon 8+ Gen 1, mirëpo aftësitë 5G për fat të keq nuk janë të disponueshme për shkak të sanksioneve të SHBA. Për të njejtin shkak, smartphone-i nuk përdor teknologjinë Gorilla Glass, por Kunlun Glass mbi ekranin 6.74”.
Në Kinë ky smartphone ofron dhe ndërlidhje satelitore, e cila nuk do të jetë e pranishme në variantin ndërkombëtar pasi përdoret protokolli Beidou Satellite Message 3. Një tjetër diferencë midis versionit kinez dhe atij ndërkombëtar është ndërfaqja e përdoruesit e cila është EMUI 13, në vend të Harmony OS 3.0.
Në tregun ndërkombëtar ky smartphone do të vijnë në ngjyrat Silver apo Black me 8GB RAM dhe 256GB internal storage për €1,299. Do të ofrohet gjithashtu dhe një model Leather Orange me memorie 8/512GB me çmim €1,399.
Përmes një konference për shtyp, Huawei tregoi se nuk ka në plan që të sjellë në tregun ndërkombëtar modelet Mate 50, Mate 50E dhe Mate 50 RS Porsche Design.
