Apple po përgatit një hap të madh drejt zgjerimit të lidhjes celulare në iPhone-t e ardhshëm, duke synuar që shërbimi 5G të jetë i aksesueshëm pothuajse kudo, edhe në zona pa mbulim tradicional. Aktualisht, iPhone ofron disa funksione bazë për përdorim në mungesë sinjali, si “Emergency SOS via Satellite”, por këto janë të kufizuara dhe shërbejnë kryesisht për raste emergjente.
Sipas një informacioni të publikuar nga burimi kinez “Fixed Focus Digital” në Weibo, Apple planifikon të integrojë teknologjinë NR-NTN (Neë Radio for Non-Terrestrial Networks) në modemin e ri C2. Kjo teknologji lejon lidhje satelitore me shpejtësi të krahasueshme me 5G-në, ndryshe nga shërbimet aktuale me bandwidth shumë të ulët. Mbështetja për këtë risi pritet të shtohet në gjysmën e dytë të vitit 2026.
NR-NTN mundëson përdorimin e rrjetit 5G përmes satelitëve, duke ofruar mbulim në zona ku mungojnë antenat tokësore, për aq kohë sa pajisja ka pamje të drejtpërdrejtë me satelitin. Kjo do të hapte rrugën për thirrje, mesazhe dhe përdorim më të gjerë të aplikacioneve, edhe në zona të izoluara.
Zhvillimi vjen pas testimeve publike të Huawei me teknologji të ngjashme në fund të vitit 2025 dhe shihet si një sinjal pozitiv për tregun global. Edhe pse burimet nga Ëeibo nuk janë gjithmonë plotësisht të besueshme, ideja është përmendur edhe më herët nga analisti i njohur Mark Gurman, i cili ka raportuar për planet e Apple lidhur me 5G NTN.
Në praktikë, kjo risi mund të lejojë që iPhone të lidhet automatikisht me satelitët pa pasur nevojë që përdoruesi ta drejtojë pajisjen nga qielli. Apple thuhet gjithashtu se po shqyrton krijimin e një API-je për zhvilluesit, duke zgjeruar përdorimin e komunikimit satelitor në aplikacione të palëve të treta. Kjo teknologji pritet të debutojë fillimisht në iPhone 18 ose modele më të reja, të pajisura me modemin C2.
