Apple është duke zhvilluar një iPhone të palosshëm me një ekran të ri inovativ të ndërtuar nga Samsung, me teknologji të re që nuk është përdorur më parë në asnjë produkt të palosshëm. Teknologjia e re integron sensorin e prekjes drejtpërdrejt në panelin e ekranit, gjë që e bën pajisjen më të hollë – rreth 19% më e hollë se komponentët aktualë të Galaxy Z Fold. Gjithashtu nuk do të ketë një shenjë palosje të dukshme në momentin që pajisja do të jetë e hapur plotësisht.
Në këtë mënyrë pajisja do të jetë më e lehtë, më e qëndrueshme dhe në përputhje me standardet e larta të Apple për efikasitet energjie dhe ndriçim.
iPhone-i i palosshëm pritet të ketë një dizajn në formë libri, me një ekran të brendshëm 7.8 inç dhe një ekran të jashtëm 5.5 inç. Ai do të përfshijë dy kamera të pasme, një kamerë të përparme, si dhe butonin Touch ID të integruar në butonin e ndezjes në vend të Face ID. Pajisja mund të jetë rreth 4.5 mm e hollë kur është e hapur dhe 9-9.5 mm kur është e mbyllur. Gjithashtu pritet të ketë një bateri me densitet të lartë.
Aktualisht, iPhone-i i palosshëm ndodhet në fazën NPI (New Product Introduction) në fabrikat e Foxconn-it, partneri kryesor i prodhimit të Apple. Prodhimi në masë mund të fillojë në pjesën e dytë të vitit 2026, ndërsa prezantimi mund të ndodhë në fund të 2026 ose fillim të 2027.
Analistët parashikojnë se çmimi i pajisjes do të jetë nga $2,000 deri në $2,500, duke e bërë atë modelin më të shtrenjtë të iPhone deri tani.
Të gjitha këto karakteristika si teknologjia e re, dizajni i hollë dhe karakteristikat e avancuara, do ta pozicionojnë këtë produkt si një pajisje super-premium në tregun e smartfonëve.
