Nëse ju keni instaluar versionin më të ri të iOS, 16.4, ndoshta keni vënë re praninë e opsionit të ri të quajtur Voice Isolation. Ky shërbim ka qenë i pranishëm më parë në FaceTime, mirëpo me versionin e ri të sistemit operativ shërbimi do të mund të përdoret dhe në telefonatat që ne kryejmë në përditshmëri.
Kur Voice Isolation është i aktivizuar, ai pengon transmetimin e të gjitha zhurmave që ndodhen përreth jush dhe fokusohet vetëm në zërin tuaj, në mënyrë që biseda juaj të mos ndërprehet në asnjë moment nga lehja e një qeni apo ndërtimet në zonën pranë jush.
Për të aktivizuar Voice Isolation ju duhet të jeni duke kryer një telefonatë, pasi nuk mund të aktivizohet automatikisht në Settings. Ndiqni hapat e mëposhtme për të aktivizuar këtë shërbim.
- Nisni një bisedë telefonike
- Hapni Control Center duke rrëshqitur nga cepi i djathtë i ekranit.
- Shtypni Mic Mode që gjendet në pjesën e djathtë të ekranit
- Aktivizoni Voice Isolation
Po opsioni Wide Spectrum si funksionon?
Së bashku me Voice Isolation do të ofrohet dhe shërbimi Wide Spectrum. Ndryshe nga Voice Isolation që pengon transmetimin e zhurmave në sfond, Wide Spectrum i amplifikon këto zhurma pa ndikuar në volumin e zërit tuaj.
Ky shërbim mund të përdoret mjaft mirë në rastet kur po bëni një telefonatë me disa persona njëkohësisht nga një linjë telefonike. Në këtë mënyrë që të gjithë personat do të dëgjohen, jo vetëm personi që mban telefonin.
