Ubisoft ka prezantuar lojën e parë të fuqizuar nga inteligjenca artificiale gjenerative, të quajtur Teammates, një eksperiment që synon të thellojë ndërveprimin mes lojtarit dhe personazheve virtualë përmes komunikimit natyral me zë. Lojtarët vendosen në një skenar FPS në një të ardhme distopike, ku personazhet kryesoreë janë në kërkim të 5 shokëve të humbur brenda një baze armike.
Niveli përfshin tre personazhe të kontrolluar nga AI: Jaspar, një asistent zanor virtual, si dhe dy shokë skuadre, Sofia dhe Pablo, të cilët ekzistojnë fizikisht në lojë. Jaspar shkon përtej funksioneve bazë të një asistenti: ai tregon armiqtë, shpjegon elementë të botës së lojës, ndryshon cilësimet dhe madje pezullon lojën përmes komandave natyrore me zë. Sofia dhe Pablo reagojnë në mënyrë të ngjashme, duke marrë urdhra taktikë dhe duke hyrë në biseda dinamike me lojtarin.
Teknologjia e Ubisoft-it përdor informacionin e mjedisit dhe kontekstin e veprimeve të lojtarit për t’u përgjigjur në kohë reale. Një skenar i hershëm demonstron sesi lojtari duhet t’i drejtojë me zë shokët që të marrin pozicione mbrojtëse dhe të sulmojnë armiqtë, përpara se të pajiset vetë me armë. Sipas drejtorit të gameplay-t, Xavier Manzanares, testimet treguan se lojtarët krijonin shpejt lidhje emocionale me NPC-të e drejtuar nga AI, ndërsa Jaspar ndihmonte orientimin dhe rrjedhshmërinë e lojës.
Pas qindra testimesh të mbyllura, Ubisoft synon të zgjerojë aftësitë e ndërveprimit dhe të pasurojë tregimin, duke theksuar se kreativiteti njerëzor mbetet në qendër të zhvillimit. Duke iu përgjigjur shqetësimeve të industrisë për humbjen e vendeve të punës dhe “ç’humanizimin” e dizajnit të lojërave, drejtuesi narrativ Virginie Mosser tha se AI nuk zëvendëson autorët: ata vendosin rregullat, karakteret dhe motivimet, ndërsa NPC-të thjesht improvizojnë brenda këtyre kufijve.
