Ish-presidenti Donald Trump tha të enjten se do të krijonte një komision qeveritar për efiçiencën për të kontrolluar të gjithë qeverinë federale, një ide e sugjeruar nga miliarderi Elon Musk, i cili do ta drejtonte atë.
Komisioni është aleanca më e fundit që ka tërhequr vëmendjen midis Trump dhe Musk, i cili udhëheq kompani të mëdha si Tesla dhe SpaceX dhe është bërë një mbështetës gjithnjë e më i zëshëm i përpjekjes së Trump për t’u rikthyer në Shtëpinë e Bardhë. Kandidati republikan presidencial pretendoi se në vitin 2022, “vetëm mashtrimi dhe pagesat e papërshtatshme u kushtuan taksapaguesve rreth qindra miliarda dollarë“.
Ai tha se komisioni do të rekomandojë “reforma drastike” dhe do të zhvillojë një plan për të eliminuar mashtrimin brenda gjashtë muajve, gjë që ai tha se do të kursente triliona dollarë. Ai i njoftoi planet në një fjalim në Klubin Ekonomik të Nju Jorkut, një grup drejtuesish dhe liderësh të industrisë, ku zbuloi gjithashtu propozime për të rritur prodhimin e energjisë, për të mbështetur kriptovalutat dhe për të ulur në mënyrë drastike shpenzimet e qeverisë, si dhe taksat e korporatave për kompanitë që prodhojnë në SHBA.
Musk mund të jetë një zgjedhje e duhur për reduktimin e shpenzimeve, pasi një gjë të tillë e provoi pas blerjes së X, ku shkurtoi stafin drastikisht dhe uli shpenzimet e kompanisë (dhe pse u has me probleme të shumta).
“Mezi pres t’i shërbej Amerikës nëse më lind mundësia,” shkroi Musk në X. “Pa pagë, pa titull, nuk ka nevojë për njohje.”
Trump dhe Musk, dy nga njerëzit më të fuqishëm në botë, janë zhvendosur nga të qenit rivalë në aleatë gjatë një sezoni zgjedhor. Musk, i cili e përshkroi veten si një “demokrat i moderuar” deri vonë, sugjeroi në vitin 2022 se Trump ishte shumë i vjetër për të qenë përsëri president. Megjithatë, Musk e mbështeti zyrtarisht Trumpin dy ditë pas tentativës së tij për vrasje muajin e kaluar.
