Edhe pse ne mund të kemi ide shumë të mira për të krijuar produkte që i bëjnë punët tona të përditshme akoma më të thjeshta, mund të mos kemi mundësinë apo mbështetjen e nevojshme për t’i realizuar këto ide.
Për fatin e mirë të të gjithë sipërmarrësve të rinj shqiptarë, Ervin Kalemi, themeluesi dhe CEO i Publer është i gatshëm t’ju ndihmojë. Nëpërmjet një postimi në rrjetet sociale ai bëri të ditur se dëshiron që hapësirat e vjetra të kompanisë së tij Publer të shfrytëzohen nga sipërmarrësit e rinj për të zhvilluar idetë e tyre pa asnjë pagesë për deri në 2 vite, me pajisje të përfshira.
Publer është një platformë e menaxhimit të mediave sociale që ju lejon të bashkëpunoni, planifikoni dhe analizoni postimet tuaja në Facebook, Instagram, Threads App, TikTok, Twitter / X, Mastodon, LinkedIn, Pinterest, Google Business, YouTube, WordPress dhe Telegram, e cila numëron mbi 350,000 përdorues.
Siç shpjegohet në video, Ervin Kalemi nisi rrugëtimin pas mbështetjes së babait të tij, i cili bëri të mundur që ai të kishte një hapësirë të veçantë për t’i dhënë jetë ideve të tij. Kjo gjë e ka inspiruar atë që njësoj si babi i tij, të mbështesë persona po aq të apasionuar në rrugëtimin e gjatë dhe të lodhshëm drejt suksesit.
Përveç shfrytëzimit të këtyre ambienteve plotësisht falas, Ervini është i gatshëm të ofrojë mentorim dhe marketim falas përmes bashkëpuntorëve të tij. Dhe nëse gjithçka duket premtuese dhe shkon me sukses, ai do të investojë cash në startup-in tuaj, duke u bërë pjesë e produkteve të Kalemi Code që kanë mbi 350,000 klientë të besueshëm.
Për të përfituar nga kjo ofertë e pabesueshme, ju ftojmë të aplikoni në këtë link.
Kujdes! Aplikimet mbyllen në datën 5 tetor 2024.
