Duke filluar nga 25 prilli, qyteti lundrues do të fillojë tarifimin e shumëpërfolur për vizitorët ditorë. Tarifa është diskutuar prej vitesh. Edhe pse pritet të zgjerohet në shtrirje, për momentin ky është një plan pilot dhe do të zbatohet vetëm në ditë të caktuara gjatë sezonit më të ngarkuar, midis 25 prillit dhe 14 korrikut.
Megjithatë, nuk janë vetëm udhëtarët ditorë ata që duhet të shqetësohen. Edhe pse njerëzit që do të kalojnë natën në qytet nuk do të duhet të paguajnë tarifën, nëse do të jenë në qytet në ato data, ata do të duhet të regjistrohen për një përjashtim.
Më 16 janar, këshilli i qytetit zbuloi platformën e tij në internet për të kryer rezervimet dhe përjashtimet. Pra, si të regjistroheni për të paguar tarifën nëse jeni duke ardhur gjatë ditës? Dhe si mund të aplikoni për një përjashtim nëse qëndroni gjatë natës? Ja çfarë duhet të dini.
Kur do të jetë në fuqi tarifa e hyrjes?
Datat ku ju duhet të paguani tarifën hyrëse në Venecia janë si më poshtë:
• 25-30 prill
• 1-5 maj
• 11-12 maj
• 18-19 maj
• 25-26 maj
• 8-9 qershor
• 15-16 qershor
• 22-23 qershor
• 29-30 qershor
• 6-7 korrik
• 13-14 korrik
Tarifa paguhet për vizitat ditore nga ora 08:30 deri në orën 16:30. Për vitin 2024, është 5 euro për person në ditë. Për vitin 2024, qyteti ka përjashtuar tarifën për ata që udhëtojnë në shumicën e ishujve të lagunës, duke përfshirë qendrat e vizitorëve Murano dhe Burano, si dhe Lido, shtëpia e plazheve të qytetit. Megjithatë, shumica e vizitorëve të Murano dhe Burano do të duhet të paguajnë tarifën gjithsesi, pasi shumica mbërrijnë duke marrë një vaporetto nga qendra e qytetit. Njerëzit që kalojnë tranzit nëpër Piazzale Roma, Tronchetto ose Stazione Marittima (ku ende ankorohen anijet e vogla turistike) do të përjashtohen, për sa kohë që nuk kalojnë në “Qytetin e Vjetër“.
Këshilli i Venecias ka lançuar një platformë në internet që ju lejon të parapaguani nëse jeni duke e vizituar për ditën. Në faqjen kryesore keni një informacion të përgjithshëm dhe dy opsione kryesore për sa i përket paguajtjes së tarifës dhe përjashtimit nga kjo tarifë.
Nëse dëshironi të paguani tarifën, mjafton të zgjidhni datën dhe të shkruani emrat e personave që do të vizitojnë qytetin, dhe në email do t’ju vijë një dokument A4 me një kod QR të skanueshëm. Nëse kjo është shumë e “vështirë” për ju do të keni mundësinë të paguani dhe në 2 pika hyrëse të qytetit.
Nëse dëshironi të aplikoni për një përjashtim nga tarifa, zgjidhni opsionin “I am a guest of an accommodation facility located in the municipality of Venice.” Më pas fusni të dhënat personale dhe emrin e hotelit ku po qëndroni manualisht.
