Njerëzit që punojnë nga shtëpia kanë më pak gjasa të kenë rritje të pagës dhe pozicionit të tyre në punë – gjë që është dhe më e theksuar tek burrat, sugjeron një studim. Projekti i parë kërkimor pas pandemisë për fenomenin e punimit nga shtëpia ka zbuluar se personat që shijojnë luksin mund të presin të përballen me ndëshkime në karrierë.
Një ekip nga Universiteti i Varshavës i prezantoi 937 menaxherëve të punësuar në biznese dhe industri të ndryshme brenda Mbretërisë së Bashkuar dy profile të anëtarëve hipotetikë të stafit me kohë të plotë, të cilët punonin ose pesë ditë në zyrë në javë, pesë ditë në shtëpi ose tre ditë në zyrë dhe dy në shtëpi.
Më pas, menaxherët zgjodhën se cilin prej tyre kishin të ngjarë të ngrinin në detyrë, dhe gjithashtu se cilit do t’i ofronin një rritje të pagës. Analiza zbuloi se menaxherët kishin 11% më pak gjasa që të ngrinin në detyrë personat që punonin tërësisht nga shtëpia sesa ato që punonin gjatë gjithë kohës në zyrë.
Punonjësit “hibridë” – ata që punonin pjesërisht në zyrë dhe pjesërisht në shtëpi – kishin mesatarisht 7% më pak gjasa për t’u ngritur në detyrë. Menaxherët kishin gjithashtu 9% më pak gjasa që t’i jepnin një rritje pagave stafit që punonte tërësisht nga shtëpia sesa atyre që ishin plotësisht në zyrë, dhe 7% më pak gjasa t’i ofronin një gjë të tillë punonjësve “hibridë”.
Studimi zbuloi gjithashtu një hendek gjinor – menaxherët kishin 15% më pak gjasa të promovonin burra që punonin tërësisht nga shtëpia sesa ata që ishin plotësisht në zyrë, dhe 10% më pak gjasa për të rritur pagën. Shifrat për gratë ishin përkatësisht 7% dhe 8%.
