Këngëtarja me famë botërore Dua Lipa ka ngritur një padi kundër gjigantit teknologjik Samsung Electronics, duke kërkuar rreth $15 milionë dëmshpërblim. Lajmi u raportua nga media amerikane Variety, e cila bëri të ditur se padia është depozituar në Gjykatën Federale për Distriktin Qendror të Kalifornisë.
Sipas dokumenteve ligjore, Dua Lipa akuzon Samsung Electronics dhe degën e saj amerikane për përdorim të paautorizuar të imazhit të saj në paketimin e televizorëve të kompanisë. Padia përfshin disa shkelje serioze ligjore, mes tyre shkelje të së drejtës së autorit, shkelje të së drejtës së publicitetit sipas ligjit të Kalifornisë, pretendime sipas Ligjit Federal Lanham dhe shkelje të markës tregtare.
Në qendër të çështjes është një fotografi e fytyrës së këngëtares, e realizuar prapa skenës gjatë Austin City Limits Festival në vitin 2024. Sipas ekipit ligjor të Lipës, ajo zotëron të drejtat e autorit mbi këtë imazh dhe nuk i ka dhënë kurrë leje Samsung-ut për përdorimin e tij. Madje, padia pretendon se kompania ka vazhduar përdorimin e fotos edhe pasi përfaqësuesit e këngëtares i kanë kërkuar zyrtarisht që të ndalojë.
Në dokumentet gjyqësore theksohet se fytyra e Dua Lipës u përdor në një fushatë masive marketingu për një produkt konsumatori pa dijeninë, miratimin apo kontrollin e saj. “Ajo nuk e lejoi dhe nuk do ta kishte lejuar kurrë këtë përdorim”, thuhet në padi.
