Sikur të mos kishte mjaftueshëm argumente në rivalitetin midis Android dhe iPhone, një studim i ri i “hedh benzinë zjarrit” duke krahasuar mënyrën e drejtimit të makinës midis dy grupeve.
Studimi vjen nga shërbimi i krahasimit të sigurimit të makinave, Jerry, i cili ka analizuar stilin e drejtimit të makinës të më tepër se 20,000 drejtuesve në SHBA. Ekipi arriti t’i ndante rezultatet në 6 kategori të ndryshme: drejtimi përgjithësisht i sigurt, drejtimi i shpërqëndruar, shpejtësia, kthimi, përshpejtimi dhe frenimi.
Në të gjithë këto kategori përdoruesit e Android rezultonin drejtuesit më të mirë të makinës. Diferenca më e madhe qëndronte në kategorinë e drejtimit të shpërqëndruar të makinës, ku përdoruesit e Android shënonin 6 pikë më tepër se ato të iPhone.
Përveç këtyre rezultateve të përgjithshme, kompania arriti të krijonte dhe disa diferencime të tjera. Pavarësisht sistemit operativ që përdornin, personat me më tepër pikë në këtë klasifikim ishin ata të martuar, që kishin një diplomë bachelor dhe një credit score të lartë.
Studime të tjera kanë treguar se përdoruesit e Android janë më të ndërgjegjshëm dhe më të sinqertë, dhe kanë shumë pak prirje për të thyer rregullat. Nga ana tjetër, përdoruesit e iPhone janë shumë më emocionalë dhe kjo gjë mund të çojë në sjellje të paqëndrueshme dhe të paparashikueshme.