Departamenti Amerikan i Drejtësisë (DOJ) ka thënë se ka paditur SpaceX të Elon Musk me pretendimin se firma e raketave diskriminon refugjatët dhe azilkërkuesit në praktikat e saj të punësimit.
DoJ thotë se SpaceX pretendoi në mënyrë të rreme se nuk lejohej të punësonte qytetarë jo amerikanë. Hetimi për SpaceX nga DoJ u nxit pas akuzave për diskriminim nga një punëtor i huaj. DoJ pretendoi se SpaceX “dekurajoi në mënyrë rutinore azilantët dhe refugjatët që të aplikonin dhe refuzoi t’i punësonte ose t’i konsideronte ata, për shkak të statusit të tyre të shtetësisë” nga shtatori 2018 deri në maj 2022.
Azilkërkuesit e autorizuar kanë të drejtën të punojnë në SHBA, mund të aplikojnë për një kartë të sigurimeve shoqërore, mund të kërkojnë leje për të udhëtuar jashtë shtetit dhe mund të aplikojnë për të sjellë anëtarët e familjes në vend.
Kompania e Elon Musk tha se lejohej të punësonte vetëm qytetarë dhe mbajtës të kartave jeshile për shkak të “ligjeve të kontrollit të eksportit“, tha DoJ. Megjithatë, DoJ tregoi gjithashtu se kjo nuk ishte e saktë dhe se këto ligje nuk i mandatojnë kufizime të tilla.
Punët nga të cilat pretendohet se janë përjashtuar aplikantët refugjatë dhe azilantë kanë një gamë të gjerë – nga inxhinieria e raketave deri te larja e enëve dhe gatimi. DoJ i ka kërkuar SpaceX-it të shikojë sigurimin e pagesës së prapambetur për ata të cilëve u është mohuar gabimisht puna për shkak të këtij diskriminimi të supozuar. Kjo padi nuk është hera e parë që një nga kompanitë e Musk akuzohet për sjellje diskriminuese. Një grup ish-punonjësish të faqes së internetit të mediave sociale të njohur më parë si Twitter, tani X, ngritën një padi në fillim të këtij muaji duke pretenduar se Musk ishte përfshirë në diskriminim gjinor, moshës dhe racial.
