Prej shumë vitesh në Shqipëri kemi patur probleme me përshkrimin e adresës së shtëpisë sonë për shkak se nuk ekziston një regjistër unik adresash, megjithatë duket se kjo gjë do të ndryshojë së shpejti.
Në një mbledhje të Këshillit të Ministrave janë miratuar disa ndryshime të reja në ligjin e adresave, dhe në adresën e tij zyrtare në rrjetet sociale, ministri Balla tregoi se nën drejtimin e tij Ministria e Brendshme do të menaxhojë një regjistër të ri të adresave në Republikën e Shqipërisë.
“Nëse deri tani kemi patur regjistra adresash nga institucione të ndryshme, një tek kadastra, një tek bashkia, një tjetër tek OSHEE. Sot do të kemi një regjistër unik në patronalitetin e Ministrisë së Brendshme.’ tha Balla.
Balla shtoi se falë këtij ndryshimi, çdo banesë, biznes apo ndërtesë në Shqipëri do të ketë një kod unik të pareplikueshëm në ministri të ndryshme. “Dhe kjo na mundëson ti japim zgjidhje përfundimtare të gjitha problematikave së pari pari me ofrimin e shërbimeve të duhura tek qytetarët. E dyta ka të bëjë me lehtësimin e mbërritjes në adresë jo vetëm të shërbimit postar por edhe për sa i përket turistëve.”
Përfitues të këtij ndryshimi nuk do të jenë vetëm qytetarët shqiptarë, të cilët do të merren vesh më lehtë me korrierët për shërbimin postar, por edhe turistët e huaj, të cilët mund të hasin probleme në gjetjen e vendndodhjes së hoteleve apo apartamenteve BNB që kanë rezervuar. Për të identifikuar adresat e reja kur ky ndryshim të bëhet, do të mund të kërkoni në adresari.mb.gov.al
