Gati gjysma e pasagjerëve po shmangin qëllimisht fluturimin me aeroplanët e Boeing. Ekspertë të shumtë të sektorit të udhëtimit thanë se gati gjysma e klientëve tani po i shmangen avionëve Boeing për shkak të një sërë problemesh me sigurinë e këtyre aeroplanëve.
Një nga incidentet më të frikshme përfshiu një dere që u hap në mesin e një fluturimi në një Boeing 737 të Alaska Airlines këtë janar. Aaron Sutherland, themeluesi i kompanisë së udhëtimeve Jetsetter Lifestyle, tha se ka pasur një ndryshim ‘të dukshëm’ në ndjenjën e klientëve rreth avionëve Boeing.
Sutherland tha: “Në muajt e fundit, pothuajse 50 për qind e klientelës sonë kanë kërkuar në mënyrë eksplicite të shmangin aeroplanët Boeing për udhëtime të brendshme dhe ndërkombëtare. Ndërsa linjat ajrore shkëmbejnë rregullisht avionë për të optimizuar operimet, këto ndryshime shpesh janë jashtë kontrollit tonë si agjenci udhëtimesh. Megjithatë, ne kemi vërejtur një trend në rritje të pasagjerëve që kontrollojnë me përpikëri llojin e avionit përpara fluturimit të tyre. Nëse është një Boeing, veçanërisht 737 MAX, ne shpesh marrim kërkesa urgjente për të rregulluar planet e udhëtimit, madje edhe në minutën e fundit.“
Dy përplasje vranë gjithashtu 346 persona të Lion Air Flight 610 në Indonezi në 2018 dhe Ethiopian Airlines Flight 302 në mars 2019 pranë qytetit të Bishoftu. Në shenjë se industria po humbet besimin, Boeing mori porosi për vetëm katër avionë të rinj në maj dhe, për të dytin muaj radhazi, asnjë për 737 Max të saj më të shitur.
Boeing përballet me një ‘rrugë të gjatë’ për të adresuar çështjet e sigurisë, tha kreu i Administratës Federale të Aviacionit këtë maj. Në fund të shkurtit, administratori i FAA, Mike Whitaker i dha Boeing-ut 90 ditë për të zhvilluar një plan gjithëpërfshirës për të adresuar ‘çështjet e kontrollit të cilësisë’ dhe e ndaloi atë nga zgjerimi i prodhimit të 737 MAX.
Sutherland thotë se pasagjerët janë veçanërisht të kujdesshëm ndaj 737 Max, i cili ende ‘ngjall frikë’ pasi avioni u ndal nga FAA për 20 muaj deri në nëntor 2020 pas dy përplasjeve të profilit të lartë. Avioni u ricertifikua nga FAA në dhjetor 2020 – por pas incidentit të Alaska Airlines (i cili përfshiu një Boeing 737 Max 9), klientët janë të kujdesshëm.
