Me ndryshimin e akrepave të orës këtë të diel, më 29 mars, ekspertët e shëndetit paralajmërojnë se edhe një ndryshim prej vetëm një ore mund të ketë ndikim të ndjeshëm në shëndetin tonë. Ndryshimi i orës zbatohet dy herë në vit në Evropë, dhe pse prej disa kohësh po mendohet që ky ndryshim të mos aplikohet më, pikërisht për shkak të përfitimeve jo të mjaftueshme që ofron.
Ndryshimi sezonal i orës u prezantua fillimisht gjatë Luftës së Parë Botërore për të kursyer energji dhe u rikthye gjerësisht në vitet 1970. Megjithatë, studimet e fundit tregojnë se veçanërisht kalimi në orën verore ka pasoja negative për shëndetin. Sipas ekspertëve, ky ndryshim prish ritmin cirkadian, orën e brendshme 24-orëshe që rregullon gjumin, vigjilencën, hormonet dhe humorin.
Jeffrey Kelu, studiues në King’s College London, shpjegon se shumica e njerëzve përshtaten brenda një jave, por disa mund të kenë vështirësi për javë ose edhe muaj. Sipas tij, genetika luan rol të rëndësishëm në mënyrën se si individët reagojnë ndaj këtij ndryshimi. Kalimi në orën verore është lidhur gjithashtu me rritje afatshkurtra të aksidenteve rrugore, infarkteve dhe episodeve depresive.
Megjithëse shumë njerëz e mirëpresin ditën më të gjatë, ekspozimi ndaj dritës deri vonë pengon prodhimin e melatoninës, hormonit që ndihmon trupin të përgatitet për gjumë. Ekspertët këshillojnë errësimin e dhomës së gjumit për të përmirësuar cilësinë e pushimit.
Ritmet cirkadiane të shëndetshme janë thelbësore për funksionimin e organizmit. Çrregullimet e tyre janë lidhur me obezitetin, sëmundjet e zemrës, diabetin e tipit 2, tensionin e lartë dhe madje edhe demencën.
Në vitin 2018, Komisioni Evropian propozoi heqjen përfundimtare të ndryshimit sezonal të orës, pas një konsultimi publik ku shumica e qytetarëve e mbështetën këtë ide. Megjithatë, shtetet anëtare nuk ranë dakord dhe çështja mbeti pezull në Këshilli Evropian. Sipas shkencëtarëve, nëse ndryshimi i orës do të hiqej, alternativa më e shëndetshme do të ishte ruajtja e orës standarde (dimërore), pasi drita e mëngjesit është thelbësore për sinkronizimin e orës biologjike.
