Nothing ka festuar hapjen e dyqanit të parë fizik të kompanisë në Londër gjatë ditës së shtunë, duke ofruar produkte si Nothing Phone 1 dhe Ear Stick bashkë me produkte të tjera të kompanisë. Produktet audio nga Teenage Engineering dhe “koleksione të kuruara nga kompanitë e modës” do të mund të blihen në këtë dyqan.
Nothing Store hapi dyqanin e parë fizik gjatë ditës së shtunë duke përmbushur kështu premtimin se do të hapte dyqanin para festave të fundvitit. Më parë Nothing ka pasur disa dyqane të përkohëshme, mirëpo ky do të jetë dyqani i parë i përhershëm nga kompania.
“2022 ka qenë një vit tepër i rëndësishëm për Nothing, pasi lançuam smartphone-in tonë të parë, Phone (1) si dhe Ear (stick), prandaj ne jemi shumë të emocionuar të hapim dyert e Nothing Store Soho për t’i mundësuar akoma më shumë njerëzve të provojnë produktet tona.” tha CEO Carl Pei.
Dyqani është dekoruar me një estetikë minimaliste dhe transparente që karakterizojnë dhe produktet e Nothing. Në dyqan gjendet gjithashtu një kabinë telefonike transparente e brenda së cilës gjendet Nothing Phone 1.
Dyqani do të jetë hapur 7 ditë në javë, dhe 100 vizitorët e parë do të kenë mundësinë të blejnë një nga 100 Ear Sticks të cilat janë të gdhendura me lazer.
