USDA ka aprovuar përdorimin e një domateje të modifikuar gjenetikisht me ngjyrë lejla, duke bërë të mundur që ky frut unik të shitet në dyqanet në SHBA duke filluar nga viti i ardhshëm.
Përveç ngjyrës së saj unike, domatja lejla sjell gjithashtu benefite nga ana shëndetësore dhe mund të rezistojë për një kohë më të gjatë në dollapet tuaja në krahasim me domatet e tjera. Kjo domate lejla do të ketë të njejtën shije dhe erë si variacionet e tjera.
Kjo domate u zhvillua nga një grup shkencëtarësh me në krye biokimisten Cathie Martin. Martin ka punuar prej 20 vitesh mbi prodhimin e pigmenteve në lule të ndryshme. “Unë dëshiroja të nisja disa projekte të reja ku mund të shikoja se ku qëndrojnë benefitet shëndetësore në një grup të caktuar pigmentesh.” tha ajo. Pigmentet që kanë tërhequr interesin e Martin janë antocianinat, të cilat i japin boronicave dhe manaferrave ngjyrën e errët.
Pasi ajo kreu testimet për rritjen e prodhimit të antocianinave në domate, tregoi se rezultatet ishin mahnitëse. Minjtë e prirur për të zhvilluar kancer që u ushqyen me domate lejla jetuan rreth 30% më tepër se minjtë e tjerë që u ushqyen me domate normale, sipas këtij studimi. “E gjitha lidhet me kapacitetin e antioksidantëve që gjenden në këtë domate.” shtoi Martin.
