Elon Musk tha se ai refuzoi një kërkesë ukrainase për të aktivizuar rrjetin e tij satelitor Starlink në qytetin port të Krimesë, Sevastopol, vitin e kaluar për të ndihmuar një sulm kundër flotës ruse atje, duke thënë se kishte frikë të komplikimit të mëtejshëm të situatës.
Biznesmeni miliarder e bëri komentin në platformën e tij të mediave sociale X pasi CNN citoi një fragment nga biografia e re e Musk që thotë se ai urdhëroi që rrjeti Starlink të fiket afër bregut të Krimesë vitin e kaluar për të penguar sulmin e fshehtë ukrainas.
Në postimin në X të enjten, Musk tha se nuk kishte zgjidhje tjetër veçse të refuzonte një kërkesë urgjente nga Ukraina “për të aktivizuar Starlink deri në Sevastopol“. Ai nuk ka specifikuar datën se kur u bë kjo kërkesë. “Nëse do të kisha pranuar kërkesën e tyre, atëherë SpaceX do të ishte në mënyrë eksplicite bashkëpunëtor në një akt të madh lufte dhe përshkallëzimi konflikti” tha Musk.
Rusia, e cila kapi gadishullin strategjik të Krimesë në vitin 2014, e ka bazën e flotës së saj të Detit të Zi në Sevastopol dhe e ka përdorur flotën si një bllokadë të porteve të Ukrainës që nga pushtimi i saj në shkallë të plotë në 2022.
Në biografinë e re të Walter Isaacson “Elon Musk”, që do të publikohet nga Simon & Schuster të martën, thotë se kur dronët ukrainas të nëndetëseve të ngarkuar me eksploziv vitin e kaluar iu afruan flotës ruse dhe “humbën lidhjen dhe u rrëzuan në breg pa shkaktuar dëme“. Në të tregohet se vendimi i Musk, i cili bëri që zyrtarët ukrainas t’i luteshin atij që të ndizte satelitët, ishte nxitur nga një frikë se Rusia do t’i përgjigjej një sulmi ukrainas me armë bërthamore.
