Profesori nga Harvard, Avi Loeb, beson se mund të ketë gjetur fragmente të teknologjisë aliene nga një meteor që u përplas në ujërat e Guinesë së Re në 2014.
Loeb dhe ekipi i tij i sollën materialet e zbuluara në Harvard për t’i analizuar. Komanda Hapësinore e SHBA-së konfirmoi pothuajse me siguri, 99,999%, se materialet vijnë nga një sistem tjetër diellor.
Llogaritjet e tyre i lejuan ata të hartonin rrugën e mundshme që meteori ndoqi deri në momentin që u përplas në tokë. Më pas Loeb dhe ekipi i tij kërkuan ndihmën e personave në varkën Silver Star në zonë për gjetjen e meteorit.
Anija kaloi disa herë përgjatë rrugës ku ishte parashikuar se ishte përplasur meteori. Studiuesit krehën fundin e oqeanit duke i vendosur në fund të varkës së tyre magnetë.
“Ne gjetëm dhjetë sfera. Këto janë sfera pothuajse të përsosura, ose mermere metalike. Kur i shikoni ato përmes një mikroskopi, ato duken shumë të veçanta,” shpjegoi Loeb, “Ato kanë ngjyra të artë, blu, kafe dhe disa prej tyre ngjajnë me një miniaturë të Tokës”. Një analizë e përbërjes tregoi se sferat përbëheshin nga 84% hekur, 8% silic, 4% magnez dhe 2% titan, plus elementë të tjerë, dhe kishin madhësi nën 1 milimetër. Ekuipazhi gjeti 50 prej tyre në total.
“Ky material ka një forcë që është më e madhe se të gjithë shkëmbinjtë hapësinorë që kemi gjetur më parë, dhe që janë kataloguar nga NASA,” shtoi Loeb, “Ne llogaritëm shpejtësinë e tij jashtë sistemit diellor. Ishte 60 km në sekondë, më i shpejtë se 95% e të gjithë yjeve në afërsi të Diellit. Fakti që përbëhej nga materiale më të forta edhe se meteoritët e hekurit, dhe që lëvizte më shpejt se 95% e të gjithë yjeve në afërsi të diellit, tregon se mund të ishte një anije kozmike nga një qytetërim tjetër ose ndonjë teknologji e re e zhvilluar nga alienët.”
