Që të gjithë ne mezi po prisnim ardhjen e verës, sepse kemi ndërmend ditët relaksuese në bregun e detit, megjithatë lufta me mushkonjat sapo ka filluar.
Shkencëtarët kanë parashikuar se do të jetë një sezon ‘shumë i keq’ i mushkonjave, duke paralajmëruar një rritje të sëmundjeve të shkaktuara nga insektet. Ndërkohë që ekzistojnë spërkatës, qirinj dhe kremra që mbajnë larg këto insekte, ekziston dhe një metodë e re për shmangien e tyre që lidhet me ngjyrën e veshjeve tuaja. Studiuesit në Universitetin e Uashingtonit zbuluan se mushkonjat tërhiqen nga e kuqja, portokallia, e zeza dhe cyan – një ngjyrë mes blusë dhe jeshiles.
Por nga ana tjetër u zbulua se insektet injoronin ngjyrat jeshile, vjollcë, blu dhe të bardhën, duke sugjeruar se këto janë opsionet më të mirat për t’u veshur kur të jeni në ambient të hapur këtë verë.
“Unë mendoja se janë tre gjërat kryesore që tërheqin mushkonjat: fryma juaj, djersa dhe temperatura e lëkurës tuaj. Në këtë studim, ne gjetëm një sinjal të katërt: ngjyrën.” tha prof. Jeffrey Riffell.
Njerëzit nxjerrin dioksid karboni, të cilin insektet mund ta nuhasin, dhe eksperimenti tregoi se CO2 bëri që sytë e mushkonjave të preferonin disa ngjyra më tepër se të tjerat. Kur u shtua një spërkatje e dioksidit të karbonit, mushkonjat fluturuan drejt pikave që ishin të kuqe, portokalli, të zeza ose cyan – por shmangën ato që ishin jeshile, blu dhe vjollcë.
