Një hartë e re interaktive, e quajtur Itiner-e, ka rikrijuar me saktësi të jashtëzakonshme rrjetin rrugor të Perandorisë Romake siç ishte rreth vitit 150 pas Krishtit, në kulmin e fuqisë së saj. Harta, e krijuar nga studiues në Spanjë dhe Danimarkë, mbulon një sipërfaqe prej 2.4 milionë kilometrash katrore që shtrihet nga Anglia veriore, Franca dhe Spanja, deri në Greqi, Turqi e Afrikën Veriore. Ky sistem përbëhej nga rreth 300,000 kilometra rrugë, shumë më tepër se vlerësimet e mëparshme.
Rrugët romake ishin arteriet e jetës së Perandorisë — përmes tyre qarkullonin ushtritë, tregtarët, ushqimet, vera dhe idetë që lidhën popujt nga Britania deri në Egjipt. Studiuesit përdorën të dhëna arkeologjike, harta topografike dhe imazhe satelitore, duke u bazuar edhe në “milestones” – gurë kilometrikë romakë që shënonin distancat dhe ende ekzistojnë në disa zona.
Edhe Shqipëria ishte pjesë e këtij sistemi monumental përmes Via Egnatia, një nga rrugët më të rëndësishme të Perandorisë Romake që lidhte Dyrrahun (Durrësin e sotëm) me Bizantin (Stambollin e sotëm). E ndërtuar në shekullin II para Krishtit, ajo kalonte përmes Elbasanit (Skampës), Ohrit dhe Selanikut, duke shërbyer si korridor strategjik për tregti dhe lëvizjes së ushtrisë midis Perëndimit dhe Lindjes. Rruga kishte gjerësi 6 metra, ishte e shtruar me gurë dhe e pajisur me stacione ndalese për udhëtarët. Sot, gjurmët e saj mbeten të dukshme në disa zona të Shqipërisë, duke dëshmuar ndikimin e qëndrueshëm të inxhinierisë romake në rajon.
Në Britani, pas pushtimit nga perandori Klaudi në vitin 43 pas Krishtit, romakët ndërtuan një rrjet të gjerë rrugësh që lidhnin qytetet e mëdha si Londinium (Londrën e sotme) me qendrat rajonale Calleva (Silchester), Corinium (Cirencester) dhe Isca Dumnoniorum (Exeter). Rrugë të famshme si Ëatling Street, që shtrihej 444 kilometra nga Shropshire në Canterbury, janë të dokumentuara në detaje.
Në kontinent, rrjeti ishte më i dendur në Itali, Francë, Belgjikë dhe Gadishullin Iberik, ndërsa mungonte në Gjermaninë Veriore e Lindore për shkak të rezistencës së fiseve gjermane. Vetëm 2.7% e rrugëve dihen me saktësi të plotë, por Itiner-e mbetet dataset-i më i plotë dhe më i saktë dixhital i krijuar deri tani. Ai pritet të ndihmojë historianët në studimin e administratës, migracionit dhe përhapjes së sëmundjeve në Perandorinë Romake.
