Rockstar Games ka konfirmuar se Grand Theft Auto VI do të vonohet përsëri, me datën e re të publikimit të shtyrë më 19 nëntor 2026. Lajmi u njoftua gjatë raportit financiar të tremujorit të dytë të Take-Two Interactive, ku kompania deklaroi se vonesa do t’i japë ekipit “kohë shtesë për të përfunduar lojën me nivelin e përsosmërisë që lojtarët presin dhe meritojnë”.
Fillimisht, GTA VI ishte planifikuar për vjeshtën e vitit 2025, më pas u shty për maj 2026, dhe tani është zhvendosur përfundimisht në fund të po atij viti fiskal. CEO i Take-Two, Strauss Zelnick, tha se ekipi “po i afrohet më shumë fazës finale të zhvillimit” dhe se kompania mbetet “mirënjohëse ndaj Rockstar për kërkimin e përsosmërisë”.
Hi everyone,
— Rockstar Games (@RockstarGames) November 6, 2025
Grand Theft Auto VI will now release on Thursday, November 19, 2026.
We are sorry for adding additional time to what we realize has been a long wait, but these extra months will allow us to finish the game with the level of polish you have come to expect and… pic.twitter.com/yLX9KIiDzX
Vonesa e re nuk është surprizë për fansat, pasi Rockstar ka një histori të gjatë shtyrjesh për projektet e saj madhore, përfshirë edhe GTA V dhe Red Dead Redemption 2. Megjithatë, shumica e fansave janë të gatshëm të presin, me shpresën se loja do të ofrojë një përvojë pa të meta.
Zelnick theksoi gjithashtu se ritmi i përditësimeve për GTA Online nuk do të ndikohet nga shtyrja e GTA VI. Ndërkohë, Take-Two po përballet me polemika pas shkarkimit të dhjetëra punonjësve të akuzuar për “sjellje të papërshtatshme” dhe për “zbulim informacioni konfidencial”, ndërsa vetë punonjësit pretendojnë se ishin në proces organizimi sindikate. Protesta janë zhvilluar para zyrave të Rockstar North dhe Take-Two në Mbretërinë e Bashkuar.
Pavarësisht tensioneve, kompania regjistroi tremujorin më të suksesshëm në historinë e saj, me 1.96 miliardë dollarë të ardhura dhe rezultate të forta nga NBA 2K26, Mafia: The Old Country dhe Borderlands 4. Ndërkohë, GTA V vazhdon të mbetet një fenomen global, me mbi 220 milionë kopje të shitura.
