Shëndoshë e mirë ama efektet e Covid-19 i kemi ndjerë të gjithë, edhe mendja më e fortë psikologjikisht nuk ka ngelur e pacënuar.
Duket se coronavirusi ka shqetësuar rutinën e gjumit tek shumë njerëz nëpër botë, kjo sipas të dhënave të Google Trends.
Termat “insomnia” dhe “can’t sleep” kanë kapur majat në Google search gjatë muajit Prill. Të dhënat nuk tregojnë sigurisht shkakun e saktë por koha përkon tamam me vendosjen agresive të karantinës nëpër glob.
Universiteti i Harvardit paralajmëroi më herët në fakt se pandemia do të ndikonte në regjimin e gjumit, çka mund të çonte më pas në komplikacione të tjera mendore por edhe fizike.
Dhe për hir të së vërtetës shumë nga ne e kanë vuajtur edhe në këtë mënyrë karantinën. Fakti që ishim gjithë kohës në shtëpi, na diktoi të flinim gjumë vonë. Por orari i punës duhej respektuar edhe pse nga kompiuteri.
Seriale pa pushim, video-lojra, dhe të tjera opsione digjitale na privonin nga orari i plotë i gjumit. Duke menduar se kompesonim orët filluam të dremisnim gjatë ditës, por kjo sipas kompetencave shëndetësore nuk bën gjë tjetër veçse çrregullon regjimin e gjumit.
Çka rezulton në probleme nga më baziku deri tek më i komplikuari.
Ndaj nëse derisa karantina ishte në fuqi, e ke kapur veten në situata jo normale, nuk ke faj kemi vuajtur të gjithë.
