Elon Musk tha se rreziku i mundshëm nga inteligjenca artificiale është aq i madh sa OpenAI, kompania më e fuqishme e inteligjencës artificiale në botë për momentin, duhet të zbulojë arsyen pse shkarkoi CEO-n Sam Altman.
OpenAI njoftoi shkarkimin e Altman të premten, duke thënë vetëm se kompania, e cila krijoi ChatGPT, “nuk ka më besim në aftësitë e tij për të vazhduar udhëheqjen“. Musk, duke iu përgjigjur një postimi në X nga ish-CEO i Yammer, David Sacks, tha se “duke pasur parasysh rrezikun dhe fuqinë e AI të avancuar, publiku duhet të informohet se pse bordi mendoi se duhej të merrte një vendim kaq drastik“.
Musk është një ish-anëtar i bordit të OpenAI, por u largua nga kompania në 2018, duke përmendur një konflikt interesi me Tesla. Megjithatë, Musk më vonë tha për CNBC se ai ishte shqetësuar nga ndikimi që kjo kompani ka në shoqëri. Sidoqoftë, vlen të përmendet se kompania e re AI nën pronësinë e Musk mund të përfitojë nga kaosi aktual në OpenAI.
Një arsye e mundshme për largimin e Altman mund të ketë qenë tensioni në rritje midis lidershipit të kompanisë mbi rreziqet që AI paraqet për njerëzimin. Altman ka kërkuar në mënyrë agresive fonde për të zgjeruar zhvillimin e teknologjisë, ndërsa disa anëtarë të tjerë të bordit i kanë bërë thirrje kompanisë të bëjë më shumë për të zbutur kërcënimet e mundshme.
Bashkëthemeluesi i OpenAI Ilya Sutskever – i cili luajti një rol në shkarkimin e Altman – preferoi të ecë më me kujdes duke pasur parasysh potencialin e AI për të dëmtuar shoqërinë. Sutskever krijoi një ekip “Super Alignment” brenda kompanisë për të siguruar që versionet e ardhshme të GPT-4 nuk do të ishin të dëmshme për njerëzimin.
