Gjigandi i teknologjisë Apple njoftoi së fundmi se planifikon të miratojë një standard të mesazheve në vitin e ardhshëm, i cili do të mundësonte një përvojë më mirë komunikimi midis iPhone dhe pajisjeve Android. Kjo përfundimisht do të zëvendësonte SMS-të dhe do të mundësonte përmirësimin e mesazheve midis telefonave inteligjentë që përdorin sisteme të ndryshme operative. Kompania deklaroi se do të ofrojë RCS përmes një përditësimi të softuerit.
Çfarë është RCS?
Rich Communications Standard ose RCS, është një shërbim komunikimi që zëvendëson protokollet e mesazheve SMS dhe MMS, të cilat janë përdorur nga telefonat inteligjentë që nga krijimi i tyre. RCS gjithashtu u mundëson përdoruesve të shpërndajnë imazhe dhe video me rezolucion më të lartë midis pajisjeve dhe gjithashtu ka veçori të tjera si aftësinë për të dërguar GIF apo emoji në biseda. Për më tepër, ai siguron nivele shtesë sigurie që mungojnë në standardet e mëparshme të mesazheve.
Çfarë ndryshimesh do të sjellë në Apple?
Apple beson se RCS “do të ofrojë një përvojë më të mirë të komunikimit” me pajisjet Android sesa protokollet e komunikimit MMS dhe SMS që iPhone aktualisht mbështet, tha një përfaqësues i Apple për Bloomberg. Zëdhënësi tha se SMS dhe MMS do të jenë të disponueshme si “rezervë” dhe se RCS “do të funksionojë së bashku me iMessage“, aplikacioni ekzistues i mesazheve i përdorur nga përdoruesit e iPhone.
Zyrtari pohoi gjithashtu se iMessage është më i sigurt se RCS. “Më vonë vitin e ardhshëm, ne do të mbështesim RCS Universal Profile, standardi që ofrohet nga Shoqata GSM. Ne besojmë se RCS Universal Profile do të ofrojë një përvojë më të mirë ndërveprueshmërie kur krahasohet me SMS ose MMS,” tha Apple.
Integrimi gjithashtu do t’i lejojë përdoruesit të ndajnë vendndodhjen e tyre me të tjerët në mesazhe. Sipas Apple, e cila dha konfirmimin për ABC News, mesazhet RCS, si mesazhet SMS, do të shfaqen gjithmonë me flluska jeshile në pajisjet Apple.
