Bishtat e cigareve përbëjnë një nga format më të përhapura dhe problematike të ndotjes mjedisore. Ato përmbajnë kryesisht acetat celuloze, një lloj plastike që degradohet shumë ngadalë dhe lëshon metale të rënda në tokë. Megjithatë, pikërisht kjo strukturë polimerike po shndërrohet tani në një burim me vlerë të lartë teknologjike.
Një ekip studiuesish nga Universiteti Henan në Kinë ka zhvilluar një metodë inovative për të ricikluar bishtat e cigares dhe për t’i kthyer ata në elektroda karboni nanoporoze për superkondensatorë, pajisje të avancuara për ruajtjen e energjisë. Këto elektroda shfaqin densitet të lartë energjie dhe fuqie, si edhe stabilitet afatgjatë, duke kombinuar në mënyrë të rrallë pastrimin e mjedisit me përfitime teknologjike.
Procesi i përdorur quhet karbonizim hidrotermal i kombinuar me pirolizë, ku mbetjet toksike shndërrohen në biochar karboni të dopuar me azot dhe oksigjen. Gjatë trajtimit në temperatura rreth 700°C, struktura e dendur e karbonit “hapet” dhe formon një arkitekturë tredimensionale si huall mjalti, me sipërfaqe jashtëzakonisht të madhe. Kjo sipërfaqe lejon lëvizje shumë të shpejtë të joneve, duke rritur ndjeshëm performancën e ruajtjes së energjisë.
Materiali rezultues arrin një kapacitet specifik shumë të lartë (344.91 F/g) dhe ruan mbi 95% të kapacitetit edhe pas 10,000 ciklesh karikim-shkarkimi, çka e bën shumë më jetëgjatë se bateritë tradicionale të smartfonëve.
Ky studim tregon se bishtat e cigares, dikur thjesht mbetje toksike, mund të shndërrohen në burime strategjike për energjinë e qëndrueshme. Superkondensatorët e prodhuar në këtë mënyrë janë idealë për stabilizimin e rrjeteve elektrike, automjetet elektrike dhe pajisjet portative. Studimi u publikua në revistën Energy & Environment Nexus më 13 janar 2026.
