Nga Ford Mustang tek Ford Focus, Ford ka disa nga makinat më të njohura në botë. Por shoferët dhe të gjithë fansat e kompanisë Ford duhet të paralajmërohen – makina juaj së shpejti mund të kthehet kundër jush.
Kjo bëhet e ditur sipas një aplikimi të ri për patentim të sapo zbuluar, i cili sugjeron se Ford po punon për të krijuar një mënyrë ku makina juaj do t’ju spiunojë tek policët në rast se tejkaloni shpejtësinë e lejuar në një rrugë të caktuar.
“Policia rrugore zakonisht përballet me lloje të ndryshme sfidash kur merret me shkelje të shpejtësisë. Ndër këto sfida është nevoja për të identifikuar shpejt dhe me saktësi një automjet që tejkalon shpejtësinë e lejuar dhe për të ndërmarrë veprime të përgjegjshme”, thuhet në përshkrimin e aplikimit për patentim. “Është e dëshirueshme që të sigurohen sisteme dhe metoda që ndihmojnë policinë e trafikut dhe/ose oficerët e tjerë të zbatimit të ligjit të kryejnë detyra të tilla.”
Fillimisht ky aplikim u zbulua nga Motor Authority, menjëherë pasi u publikua nga Zyra e Patentave dhe Markave të SHBA USPTO më 18 korrik. Gjithashtu në të detajohet një sistem në të cilin makinat mund të pajisen me kamera për të monitoruar shpejtësinë e makinave të tjera në rrugë.
Pra, nëse makina juaj dallon një makinë aty pranë duke tejkaluar kufirin e shpejtësisë, ajo mund ta fotografojë atë automjet dhe ta dërgojë foton direkt në polici. “Imazhi mund të vlerësohet për të përcaktuar të paktën një veçori identifikuese të automjetit të dytë,” shpjegon Ford në patentë. ‘Regjistrimi mund të përfshijë matjen e shpejtësisë, imazhin dhe veçorinë e parë identifikuese.“
Megjithatë, detaje të mëtejshme se si mund të funksionojë sistemi, si dhe ku dhe kur mund të zbatohet, mbeten të paqarta.
