Sipërmarrësit si Elon Musk duan të dërgojnë njerëz në Hënë ose Mars për të siguruar që njerëzimi t’i mbijetojë një fatkeqësie klimatike globale. Por në rast të një katastrofe të tillë, si do ta mbrojmë botën e egër të këtij planeti?
Shkencëtarët më në fund mund të kenë një përgjigje, pasi propozojnë ruajtjen e qelizave të ngrira të miliona llojeve të kafshëve në rrezik zhdukje, duke filluar nga gjitarët te zvarranikët, zogjtë dhe amfibët. Në rast se jeta në Tokë zhduket, këto qeliza mund të klonohen për të krijuar jetë të re – qoftë në Tokë, në Hënë apo në një planet tjetër.
Shkencëtarët në Kopshtin Zoologjik Kombëtar Smithsonian dhe Institutin e Biologjisë së Konservimit (NZCBI) kanë përshkruar planin e tyre jashtëzakonisht ambicioz në një punim të botuar në BioScience.
Edhe pse ata nuk e vlerësojnë koston e saktë të një biorepozitori hënor, ata thonë se ka të ngjarë të jetë pesë herë më e shtrenjtë për t’u krijuar në Hënë se në Tokë, por më e lirë për t’u mirëmbajtur. Kjo kasafortë hënore do të ruante qeliza të kriorezervuara të specieve shtazore, megjithëse versionet e tjera mund të strehonin gjithashtu farat e ngrira të bimëve.
“Fillimisht, një biorepozitor hënor do të synonte speciet më të rrezikuara në Tokë sot”, tha autorja kryesore Mary Hagedorn, një kriobiologe në NZCBI. “Por qëllimi ynë përfundimtar do të ishte të ruanim shumicën e specieve në Tokë.” Në një distancë mesatare prej 384,400 km, Hëna është mjaft larg nga Toka për t’i mbijetuar problemeve klimatike që do të zhduknin kafshët e planetit.
