A e imagjinoni se sa e frikshme duket ideja e përplasjes së një SUV të madh me një makinë disa herë më të vogël në përmasa? Sado e frikshme të duket, Volvo ka besim se ju mund të dilni shëndoshë e mirë pas një përplasjeje anësore.
Në qendrën e saj të sigurisë në Torslanda, Suedi, marka në pronësi të Geely organizoi një test përplasjeje me modele të pozicionuara në skajet e kundërta të linjës. Vetëm 4,23 metër e gjatë, EX30 është modeli më i vogël që shet Volvo, dhe vjen me një peshë 2,2 ton. Dhe pse me hapësirë më kompakte, ky mjet ishte i përsosur sipas Red Dot, e cila e vlerësoi makinën me çmimin Best of the Best Product Design 2024.
Nga ana tjetër EX90 është një gjigant elektrik 5 metër i gjatë dhe peshon 3,37 ton. Disa media të ndryshme u ftuan për të shikuar drejtpërsëdrejti përplasjen, dhe të raportonin më pas atë që ndodh kur një makinë gjigande godet në pjesën anësore një makinë më të vogël.
Shikojeni videon e mëposhtme dhe na tregoni mendimet tuaja në komente.
Vlen të përmendet se EX90 kishte një shpejtësi prej 50 km/h ndërsa EX30 po udhëtonte me 20 km/h në momentin e përplasjes. Meqë përmendëm shpejtësinë, duam të theksojmë se të gjitha modelet e Volvo-s kanë patur një kufizim elektronik të shpejtësisë deri në 180 km/h që nga viti 2020.
Brenda SUV-së më të vogël ishin dy kukulla femra me përmasa të vogla në anën e automjetit me të cilin u përplas Volvo. Lotta Jakobsson, Specialiste e Lartë Teknike, shpjegoi në një intervistë se si konstruksioni i EX90 zvogëlon rrezikun e shkaktimit të lëndimeve të personave brenda EX30.
Pjesa e poshtme e strukturës së përparme të SUV-it më të madh ndërveproi me strukturën anësore të automjetit më të vogël për të thithur më mirë forcat e përplasjes. Meqenëse të dyja janë SUV krejt të reja, as EX30 dhe as EX90 nuk janë testuar ende nga Euro NCAP ose NHTSA. Do të ishte e habitshme për ne të dëgjonim se këto dy makina nuk do të arrijnë vlerësimin maksimal.
Misioni i Volvo nuk është vetëm të prodhojë makinat më të sigurta në rast përplasjeje, por të eliminojë mundësinë e një aksidenti. Është pjesë e vizionit të sigurisë së Volvo Group për mënyrën se si mund të parandalojë aksidentet.
