Formula 1 pritet të bëjë një ndryshim të madh në motorë, duke kaluar nga njësitë aktuale hibride V6 në motorë më të thjeshtë dhe më të zhurmshëm V8 duke nisur nga viti 2031, ose madje që në 2030. Këtë e konfirmoi presidenti i FIA-s, Mohammed Ben Sulayem, gjatë Çmimit të Madh të Miamit, duke theksuar se ky ndryshim është i pashmangshëm dhe vetëm çështje kohe.
Aktualisht, Formula One ka hyrë në një epokë të re motorësh, ku fuqia ndahet afërsisht 50-50 midis energjisë elektrike dhe asaj me djegie, duke përdorur gjithashtu karburant plotësisht të qëndrueshëm. Ky sistem shpesh herë është kritikuar nga pilotët, të cilët ankohen për nevojën për të “ngadalësuar dhe kursyer energji” në kthesa të shpejta për të karikuar baterinë, si dhe për shqetësime sigurie për diferencat e shpejtësisë gjatë garave.
Për më tepër, rregullat janë bërë më komplekse për fansat, me terma të rinj teknikë si “superclipping” dhe kufizime mbi energjinë e rikuperuar. Sipas Ben Sulayem, synimi është thjeshtimi i teknologjisë dhe rikthimi i emocioneve përmes motorëve më të lehtë dhe me zhurmë më të fuqishme.
Ndryshimi mund të ndodhë në vitin 2030 nëse një shumicë e madhe e prodhuesve të motorëve e miratojnë, përndryshe FIA ka autoritetin ta vendosë në mënyrë të njëanshme në vitin 2031. Aktualisht, prodhues si Mercedes, Ferrari, Red Bull (me Ford), Honda dhe Audi janë të përfshirë, ndërsa General Motors planifikon të hyjë me Cadillac.
Edhe pse është diskutuar mundësia e motorëve V10, ata konsiderohen jo praktikë, ndërsa V8-të janë më të preferuar për shkak të përdorimit të tyre të gjerë dhe avantazheve si thjeshtësia, pesha më e ulët dhe tingulli karakteristik. Formula 1 përdori motorë V8 nga 2006 deri në 2013, përpara kalimit në motorët aktualë hibridë V6.
