Bugatti Chiron ka arritur në fundin e rrugëtimit të tij. Marka franceze zbuloi të enjten shembullin e 500-të dhe të fundit të supermakinës së saj të dytë moderne.
I emërtuar si Chiron L’Ultime, që përkthehet në shqip “i fundit”, largohet nga Molsheim tetë vjet pasi filloi prodhimi i automjetit që shtyn kufijtë. Chiron i fundit është, çuditërisht, një rikthim në versionin origjinal. L’Ultime vjen me një ngjyrë mahnitëse që kombinon blunë Atlantike dhe blunë franceze Racing, të njëjtat ngjyra që ka pasur Chiron debutues që u prezantua në Motor Shoë në Gjenevë në 2016.
Ndryshe nga makinat e ekspozitës, të dy ngjyrat tani përzihen pa probleme me njëra-tjetrën. Emrat e shkruar me dorë të vendeve të rëndësishme në historinë e Chiron – si Paul Ricard, pista ku u testuan prototipet dhe Ehra-Lessien, pista ku makina u bë automjeti i parë që thyente barrierën e shpejtësisë deri në 490km/h – zbukurojnë panelet anësore ku ngjyrat kombinohen me njëra-tjetrën.
Numri “500” është pikturuar gjithashtu në pjesën e poshtme të spoilerit të pasmë të makinës, përpara rrotave të pasme dhe në kapakët e rrotave, si dhe është gdhendur në kapakun e motorit. Interiori me porosi të L’Ultime është pak më i qetë. Kabina me dy vende kombinon dekorimin me fibër karboni me ngjyrë blu me lëkurën ngjyrë blu të errët që është punuar dhe qepur me dorë.
Chiron i fundit është një Super Sport, që do të thotë se fuqizohet nga motori 8.0-litërsh W-16 i Bugatti-t, i cili prodhon 1,578 kuajfuqi. Falë gjithë asaj fuqie, varianti verbues mund të shpejtojë nga zero në 100km/h në 2.3 sekonda dhe të arrijë një shpejtësi maksimale të kufizuar elektronikisht prej 440km/h.
Bugatti nuk ka përmendur se kush është pronari i fundit i Chiron, megjithëse Motor1.com raporton se ka të ngjarë të jenë nga SHBA. Është gjithashtu e paqartë se sa kanë paguar për automjetin, i cili tashmë është një nga makinat më të shtrenjta në botë. Ne imagjinojmë se ata kanë paguar mbi çmimin fillestar prej $3.7 milionë të Chiron Super Sport.
Prezantimi i L’Ultime do të thotë gjithashtu se është koha për të filluar numërimin mbrapsht deri në debutimin e pasardhësit të Chiron-it me V-16, i cili pritet të ndodhë diku muajin e ardhshëm.
