Disa pasagjerë po raportojnë një fenomen të papritur gjatë udhëtimeve me makina elektrike: shfaqjen e simptomave të të përzierave, edhe tek ata që nuk kanë pasur më parë probleme me lëvizjen në automjete tradicionale. Ndryshe nga makinat me motorë me djegie të brendshme, automjetet elektrike (EV) ofrojnë një përvojë drejtimi më të qetë e më të heshtur, por kjo qetësi duket se krijon një efekt anësor të padëshiruar për disa udhëtarë.
Ekspertët thonë se disa faktorë mund të kontribuojnë në këtë shqetësim. Përshpejtimi i shpejtë, frenimi rigjenerues dhe mungesa e zhurmës së motorit apo vibrimeve tradicionale e bëjnë më të vështirë për trurin të parashikojë lëvizjet e mjetit. Pikërisht kjo mospërputhje mes asaj që ndjen trupi dhe asaj që pret truri shkakton të përzierat. Një studim i kryer në Kinë, një nga tregjet më të mëdha për EV, tregoi se simptomat e sëmundjes së lëvizjes janë më të forta tek këto makina krahasuar me ato me karburant.
Profesorë të psikologjisë së aplikuar theksojnë se pasagjerët janë më të rrezikuar sesa drejtuesit, pasi nuk kanë kontroll mbi lëvizjet e makinës. Ky problem mund të bëhet edhe më i mprehtë me rritjen e përdorimit të makinave self-driving, ku kontrolli i pasagjerëve është i kufizuar. Për këtë arsye, industria automobilistike po shqyrton zgjidhje inovative, si sisteme paralajmëruese me vibrime në sedilje, që ndihmojnë udhëtarët të parashikojnë kthesat apo frenimet. Gjithashtu duhet të ulni frenimin rigjenerues në minimumin e mundshëm.
Ndërkohë, mjekët dhe ekspertët e shëndetit publik sugjerojnë disa masa praktike: të ulesh në sediljen e përparme për të pasur një pamje më të qartë të rrugës, të shmangësh leximin apo përdorimin e telefonit gjatë udhëtimit ose të përdorësh medikamente kundër të përzierave. Një studim nga Japonia madje tregon se dëgjimi i tingujve me frekuencë 100Hz mund të ndihmojë duke stimuluar veshin e brendshëm.
Ndërsa makinat elektrike shënojnë një hap të madh drejt së ardhmes së qëndrueshme, ato sjellin gjithashtu një sfidë të re për pasagjerët. Prodhuesit do të duhet të balancojnë përfitimet ekologjike dhe teknologjike me rehatinë fizike, për të siguruar që udhëtimet elektrike të jenë jo vetëm të qeta dhe të pastra, por edhe pa shqetësime shëndetësore.
