Hummer ka zbuluar versionin SUV elektrik të ri, i cili vjen me një autonomi prej 480 kilometrash dhe do të jetë në shitje me çmimin $110,595. Sipas GM, rezervimet për këtë model janë plotësuar tashmë.
GM do të fillojë prodhimin e Hummer-it elektrik nën brendin GMC në vitin 2023, fillimisht me variantet më të lira prej $80,000 me autonomi prej 400 kilometrash dhe variantet $90,000 gjatë verës.
Njësoj si pickup, variantet $90,000 do të ofrojnë shërbimin “Crab Walk”, ku Hummer mund të rrotullojë të 4 rrotat për një lëvizje diagonal në shpejtësi të vogla, dhe Extract Mode ku sistemi i amortizatorëve me ajër do të ngrejë makinën 15.4 centimetra nga toka për të kaluar mbi pengesat e mëdha. Në pjesën e brendshme gjendet i njejti ekran touchscreen 13.4 inç dhe një ekran 12.3 inç para drejtuesit të makinës.
GM ndaloi prodhimin e Hummer në 2010, pasi çmimet e naftës u ngritën dhe shitjet e kësaj makine ranë në mënyrë drastike. Vitin e kaluar kompania u shpreh se do të risjellë një version të saj elektrik me 1000 kuaj fuqi që mund të lëvizë diagonalisht. Këto makina do të jenë ndër të parat që përdorin modulin e ri të platformës së baterisë, Ultium, e cila do të furnizojë me energji deri në 200kWh, duke bërë të mundur udhëtime “më të gjata se 600km”, sipas GM.
Ndër shërbimet e tjera do të jetë dhe gjenerata e dytë e asistentit të avancuar të drejtuesit, Super Cruise, që do të lejojë drejtimin pa duar në autostrada.
