Mund të ketë qëlluar në raste të ndryshme gjatë parkimit të makinës ku ju keni dëshiruar që makina juaj të jetë më e ngushtë, për ta parkuar atë në mënyrë të rregullt.
Një startup nga Izraeli duket se ka gjetur një zgjidhje për këtë problem, pasi ka prezantuar një mini makinë elektrike që mund të kalojë në hapësira vetëm 100cm të gjëra. Kjo gjë mundësohet falë aftësisë së veçantë që makina ka për të “fshehur” gomat brenda trupit të makinës.
City Transformer (CT-1) kushton €16,000 dhe bën të mundur që ju t’i shmangeni trafikut sikur të ishit në një biçikletë ndërkohë që ju ofron komfortin dhe sigurinë e një makine, siç tregojnë krijuesit e saj.
Krijuesit pretendojnë se kjo makinë mund të parkohet në vende shumë të ngushta, duke rritur shancet që ju të gjeni një vend parkimi me 10 herë. Drejtuesit e kësaj makine mund të drejtojnë makinën e tyre në dy konfigurime, njëra prej të cilave kalon në hapësira të ngushta deri në 100cm duke futur gomat brenda trupit të makinës, ndërkohë që konfigurimi tjetër i jep më tepër stabilitet makinës.
Pavarësisht se është një makinë shumë e vogël, ajo mund të arrijë shpejtësinë deri në 120km/h, si dhe mund të karikohet deri në 80% në më pak se një orë. Me vetëm një karikim kjo makinë mund të kryejë deri në 177km.
