Google Photos po shton një shërbim të ri argëtues të bazuar në inteligjencën artificiale, e cila u lejon përdoruesve të krijojnë meme duke përdorur imazhet e tyre personale. Funksioni i ri quhet “Me Meme” dhe u prezantua zyrtarisht nga Google. Fillimisht, kjo veçori do të jetë e disponueshme vetëm për përdoruesit në SHBA dhe do të shpërndahet gradualisht në iOS dhe Android gjatë javëve në vijim.
“Me Meme” funksionon duke kombinuar një model meme-je (template) me një foto të përdoruesit, për të gjeneruar automatikisht një imazh të ri në stil meme. Google thekson se kjo veçori është ende eksperimentale, ndaj rezultatet mund të mos përputhen gjithmonë në mënyrë perfekte me foton origjinale. Për rezultate më të mira, kompania rekomandon përdorimin e fotove të ndriçuara mirë, të qarta dhe me fytyrë përballë kamerës.
Kjo risi synon kryesisht argëtimin dhe eksplorimin kreativ të fotove personale, duke shërbyer njëkohësisht si mënyrë për të prezantuar dhe testuar më gjerësisht teknologjitë AI të Google, përfshirë Gemini AI dhe modelin e tij të gjenerimit të imazheve, i njohur si Nano Banana. I njëjti model fuqizon edhe veçori të tjera të Google Photos, si rikrijimi i imazheve në stile të ndryshme artistike, për shembull karikatura apo piktura.
Edhe pse “Me Meme” nuk është një veçori serioze në thelb, ajo ka vlerë strategjike për Google, pasi inkurajon përdoruesit të rikthehen shpesh në aplikacionin Photos për të eksperimentuar me mjete AI, në vend që të përdorin produkte konkurruese. Përvoja ka treguar se përdoruesit tërhiqen veçanërisht nga mjetet që i përfshijnë vetë në përmbajtje të gjeneruara nga AI.
Kur funksioni të aktivizohet, ai do të shfaqet në seksionin “Create”. Përdoruesit do të mund të zgjedhin një template, të shtojnë foton e tyre, të gjenerojnë meme-n, ta ruajnë, ta shpërndajnë ose ta rigjenerojnë për variante të tjera.
