Nëntëmbëdhjetë anëtarë të Kongresit po e shtyjnë Mark Zuckerberg të shpjegojë pse Meta ka lejuar që reklamat për kokainë, ekstazi dhe droga të tjera të shfaqen në Facebook dhe Instagram.
Ata ja nisën letrën CEO-s së Meta pasi Projekti i Transparencës Teknike (TTP) zbuloi qindra reklama të tilla në platformën e kompanisë. Letra tregon për raportin e TTP-së muajin e kaluar, i cili përdori bibliotekën e reklamave të Meta për të gjetur 450 reklama në Instagram dhe Facebook “që shisnin një sërë barnash farmaceutike dhe të tjera“.
Shumë nga ato reklama përfshinin “foto të shisheve të barnave me recetë, grumbuj pilulash dhe pluhurash ose tulla kokaine” dhe i drejtonin shikuesit që të komunikonin në aplikacione të tjera si Telegram. Që atëherë, TTP ka postuar shembuj shtesë të reklamave të tilla në X.
“Meta duket se ka vazhduar të shmangë përgjegjësinë e saj sociale dhe të kundërshtojë udhëzimet e veta të komunitetit”, shkruajnë ligjvënësit në letrën, e cila i drejtohet drejtpërdrejt Zuckerberg. “Ajo që është veçanërisht skandaloze në këtë rast është se kjo nuk ishte përmbajtje e krijuar nga përdoruesit në dark web ose në faqet private të mediave sociale, por ato ishin reklama të miratuara nga Meta. Shumë nga këto reklama përmbanin referenca flagrante për drogat ilegale në titujt, përshkrimet, fotot dhe emrat e llogarive të reklamuesve, të cilat u gjetën lehtësisht nga studiuesit dhe gazetarët në Wall Street Journal dhe Projektin e Transparencës Teknike duke përdorur Bibliotekën e Reklamave të Meta. Megjithatë, ato duket se kanë kaluar të pazbuluar ose janë injoruar nga proceset e brendshme të Metës.”
Letra kërkon detaje në lidhje me politikat e Metës për zbatimin e rregullave kundër reklamave të lidhura me drogën, si dhe informacion se sa herë janë parë dhe ndërvepruar reklamat e raportuara. I jep Metës një afat deri më 6 shtator për t’u përgjigjur. Një zëdhënës i Metës tha se kompania planifikon t’i përgjigjet letrës dhe në një deklaratë paraprake, të publikuar nga The Wall Street Journal, tha se ka refuzuar “qindra mijëra reklama për shkelje të politikave tona të drogës“.
