Gjatë disa ditëve të fundit, përdoruesit e Facebook janë revoltuar pasi ikona në iPhone e aplikacionit u paraqit me një dizajn të ri me ngjyrat blu dhe të zezë.
Megjithatë, siç rezulton, ky është thjesht një gabim dhe Facebook tashmë do të ofrojë një update për ta rregulluar. Siç raportohet nga Business Insider, ky ndryshim në ikonën e Facebook ishte një “çështje teknike” dhe jo një ribrandim i aplikacionit.
“Kjo është shkaktuar nga një problem teknik dhe është zgjidhur. Njerëzit do ta shohin rregullimin kur të përditësojnë aplikacionin e tyre”, tha në një deklaratë menaxheri i komunikimit të Meta, Dave Arnold.
Ikona e re ishte një largim domethënës nga dizajni klasik i me ngjyrat blu dhe të bardhë të Facebook-ut dhe përdoruesit nuk ishin të lumtur për ndryshimin. Ndërsa iOS 18 përfshin opsione të reja që personalizojnë ikonat e aplikacioneve — përfshirë një opsion të sistemit që i bën të errëta të gjitha ikonat në home screen— ky defekt në Facebook preku edhe njerëzit që përdornin iOS 17.
Pra, nëse ju nuk e duroni dot këtë pamje problematike të Facebook, mjafton të përditësoni aplikacionin, dhe nëse kjo gjë nuk funksionon, ri-instalojeni nga e para.
