Departamenti i Drejtësisë së SHBA të mërkurën argumentoi se Google duhet të shesë browser-in e tij të internetit Chrome pasi një gjykatë federale vendosi në fillim të këtij viti se kompania mbante një monopol të paligjshëm mbi kërkimet në internet.
Rregullatorët amerikanë argumentuan gjithashtu se Google duhet të ndajë të dhënat dhe rezultatet e kërkimit me konkurrentët, ndër të tjera, në përpjekjet për t’i dhënë fund monopolit të kompanisë, sipas Reuters.
“Sjellja e paligjshme e Google i ka privuar rivalët jo vetëm nga kanalet kritike të shpërndarjes, por edhe nga partnerët e shpërndarjes, të cilët mund të mundësojnë hyrjen në këto tregje në mënyra të reja dhe inovative,” tha DD në një dosje gjyqësore.
Në gusht, një gjykatës përcaktoi se Google kishte ndërtuar një monopol të paligjshëm mbi kërkimet në internet, pasi më shumë se 90% e kërkimeve përpunohen përmes gjigantit të motorëve të kërkimit. Google ka bërë pagesa miliarda dollarësh për Apple dhe prodhues të tjerë pajisjesh për vite me radhë për të siguruar që motori i tij i kërkimit të jetë i paracaktuar në telefonat inteligjentë dhe browser-at për të ruajtur një pjesë kaq të madhe tregu.
Mjetet juridike të propozuara nga DOJ mund të kenë një ndikim të rëndësishëm në mënyrën se si amerikanët gjejnë informacion në internet, ndërkohë që zvogëlojnë të ardhurat e Google dhe u japin konkurrentëve të tij një mundësi për t’u rritur.
Kërkesat nga DD përfshijnë ndalimin e përfshirjes për 5 vite të Google në tregun e browser-ave, këmbënguljen që Google të shesë sistemin e tij operativ celular për Android nëse konkurrenca nuk rikthehet, dhe ndalimin e Google që të blejë ose investojë në rivalët e kërkimit, produktet e AI ose teknologjinë e reklamave.
Google i ka quajtur propozimet e DD-së radikale dhe tha se do të apelojë. Google paralajmëroi më parë se shitja e Chrome dhe Android “do t’i shkatërronte ato” sepse kompania aktualisht i ofron ato dhe kodin e tyre falas në bazë të burimit të hapur.
