Gjigandi amerikan i teknologjisë Apple është urdhëruar të paguajë një gjobë prej €1.8 miliardë pasi ka abuzuar me pozicionin dominues në treg për të penguar aksesimin e aplikacioneve të transmetimit të muzikës për përdoruesit e iPhone dhe iPad, tha Komisioni Evropian.
Hetimi zbuloi se kompania aplikoi kufizime për zhvilluesit e aplikacioneve duke i penguar ata të abonoheshin me tarifa më të lira jashtë aplikacionit të përdorur në smartphone. “Për një dekadë, Apple abuzoi me pozicionin e saj dominues në treg për aksesimin e aplikacioneve të transmetimit të muzikës përmes App Store. Ata e bënë këtë duke kufizuar zhvilluesit që të informonin konsumatorët për shërbimet muzikore alternative dhe më të lira të disponueshme jashtë ekosistemit Apple. Kjo është e paligjshme sipas rregullave antitrust të BE-së, kështu që Apple do të paguajë një gjobë”, tha nënpresidentja e Komisionit Margarethe Vestager.
“Disa konsumatorë mund të kenë paguar më shumë – sepse nuk ishin në dijeni. Të tjerët mund të mos kenë qenë në gjendje të gjejnë alternativa. Ne i konsiderojmë ato si kushte të padrejta tregtare,” shtoi Vestager.
Apple tani duhet të heqë këto kushte në të ardhmen, dhe përveç kësaj gjigandi i teknologjisë duhet të lejojë zhvilluesit të komunikojnë me përdoruesit e tyre. Në një përgjigje ndaj gjobës së sotme, Apple tha në një deklaratë se do të apelojë vendimin. “Ne kemi ndihmuar tregjet të lulëzojnë, duke promovuar konkurrencën dhe inovacionin në çdo hap – dhe App Store është një pjesë e rëndësishme e kësaj historie. Pra, ndërsa ne respektojmë Komisionin Evropian, faktet thjesht nuk e mbështesin këtë vendim. Dhe si rezultat, Apple do të apelojë”, thuhet në njoftim.
BE nisi hetimin e akuzave ndaj Apple për pengimin e aksesimit të shërbimeve të tjera muzikore në pajisjet e saj pasi kompania suedeze e transmetimit të muzikës Spotify paraqiti një ankesë zyrtare në vitin 2019. Spotify, nga ana e tij, tha në një reagim se vendimi i komisionit është një moment i rëndësishëm në luftën për një internet më të hapur për konsumatorët.
