Eventi Galaxy Unpacked u organizua për herë të dytë brenda këtij viti menjëherë pas eventeve të organizuara nga Apple dhe Google. Kësaj here Samsung nuk publikoi pajisje të reja, por prezantoi disa versione të reja të Galaxy Z Flip 3 dhe Galaxy Watch 4.
Samsung Galaxy Z Flip 3 Bespoke Edition
Tashmë ju do të keni mundësinë të personalizoni look-un e pajisjes së palosshme Galaxy Z Flip 3 që u prezantua vetëm 3 muaj më parë. Bespoke Edition do të lejojë klientët të zgjedhin ngjyra specifike për panelet e parmë dhe të pasmë. Gjithashtu ju mund të zgjidhni midis një frame të zi ose silver.
Në total, Samsung do të ofrojë 49 kombinime ngjyrash të ndryshme për të kënaqur të gjitha dëshirat e klientëve. Ky version do të kushtojë $1,099, $100 më tepër se versioni standard i Flip 3.
Galaxy Watch 4 Bespoke Edition
Dhe Samsung Galaxy Watch 4 do të vijë me një Bespoke Edition, e shoqëruar nga një Maison Kitsune Edition që mund të bëhet e juaja për $399. Lajmi kryesor për këtë pajisje ka të bëjë me përfshirjen e shërbimeve të reja. Përdoruesit tashmë kanë mundësinë të përdorin live wallpaper si watch face dhe të përdorin shërbimin knock-knock për të lançuar një aplikacion të caktuar.
Nga ana tjetër shërbimi fall detection është përmirësuar, duke u bërë gjithnjë e më i saktë me kalimin e kohës. Përdoruesit e Galaxy Watch 4 do të mund të përfitojnë një trial 60 ditësh në aplikacionin Strava.
Samsung prezantoi gjithashtu dhe një bashkëpunim me Maison Kitsune, një kompani franceze, me të cilën do të krijohen disa versione të limituara të Galaxy Buds 2.
