Karikimi i shpejtë mbetet një problem në shumë industri të cilat duan të varen krejtësisht nga elektriciteti, makinat ndoshta kanë ende shumë rrugë për të bërë, ndërsa smartphonat ndoshta do ta zgjidhin këtë punë njëherë e mirë.
Qualcomm mbreti i proçesorëve sapo lajmëroi Quick Charge 5 100W+ e cila e kalon me hapa galopantë QC4 ndërsa e mban baterinë 10° më të freskët dhe është 70% më efikase.
Sipas testeve të kompanisë, një bateri 4,500 mAh mund të karikohet nga 0% në 50% në vetëm 5 minuta, një karikim i plotë 15 minuta.
Po geeksa, mjaftueshëm sa për të ngrënë një tas drithëra dhe rifillon sessionin tjetër PUBG.
Sistemi funksionon nëse bateria është e pajisur me dual charge, e cila e ndaj baterinë në dy pila nga 2,250mAh të lidhura në seri për voltazh më të lartë. Edhe triple charge funksionon.
Qualcomm shpreson ta shohë QC5 nëpër smartphona nga tre mujori i tretë, për këtë ka prezantuar dy kontrollues karikimi që prodhuesit mund të përdorin. Ata përballojnë edhe karikimin pa fije edhe atë me kabull dhe mund të përdoren në bateri me 1 apo 2 pila. Alternativat me një pilë do të limitohen tek karikimi 45W i cili është gjithsesi mjaft i shpejtë.
Snapdragon 865 dhe 865+ e përballojnë që tani QC5, por kjo nuk do të thotë se smartphonët e momentit do të mund ta përdorin pasi duhet të pajisen me çipin e ri kontrollues.
