Përdorimi i inteligjencës artificiale për krijimin e përmbajtjes në rrjetet sociale po rritet me ritme të shpejta, dhe sipas një studimi të ri nga Pangram Labs, LinkedIn është platforma ku ky fenomen është më i përhapur. Analiza zbulon se më shumë se 40% e postimeve të gjata në rrjetin profesional janë shkruar tërësisht nga AI.
Kompania, e themeluar në vitin 2023 nga ish-studentë të Stanford, analizoi mijëra postime duke përdorur modelin e saj të zbulimit të tekstit të gjeneruar nga AI, Pangram 3.3. Sipas saj, modeli ka një normë shumë të ulët gabimesh, rreth 0.01%, megjithëse vetë kompania pranon se asnjë sistem i tillë nuk është i pagabueshëm.
Rezultatet nuk janë shumë befasuese për përdoruesit, të cilët prej kohësh kanë vënë re se shumë postime në LinkedIn ndjekin të njëjtin stil shkrimi dhe formulime të përsëritura. Përmbajtje të tilla, shpesh të quajtura “AI slop”, janë bërë aq të zakonshme sa termi “slop” u shpall fjala e vitit nga Merriam-Webster në fund të vitit të kaluar, duke përshkruar përmbajtjen me cilësi të ulët të prodhuar masivisht nga inteligjenca artificiale.
Fenomeni nuk kufizohet vetëm te LinkedIn. Sipas studimit, rrjeti X kishte përqindjen më të lartë të postimeve ku AI ishte përdorur në një formë ose tjetër. Rreth 24% e postimeve të gjata rezultuan të krijuara plotësisht nga AI, ndërsa afro 23% ishin shkruar me ndihmën e saj. Edhe platforma Substack, e njohur për artikujt e gjatë dhe opinionet, nuk i ka shpëtuar këtij trendi.
Megjithatë, LinkedIn mbetet rasti më ekstrem. Edhe pse përbënte vetëm rreth një të tretën e postimeve të analizuara, platforma përfaqësonte 62% të gjithë përmbajtjes së identifikuar si të krijuar nga AI.
Ironikisht, vetë LinkedIn ofron mjete të integruara për shkrim me AI, si funksioni “Enhance post”, ndërsa së fundmi ka njoftuar se po punon për të identifikuar dhe ulur shikueshmërinë e postimeve të gjeneruara nga inteligjenca artificiale. Pangram Labs vëren me humor se edhe ky njoftim rezultoi të ishte krijuar me ndihmën e AI.
