Trupat IRGC kanë kërcënuar se do të sulmojnë operacionet e kompanive të mëdha teknologjike amerikane në Lindjen e Mesme. Sipas raportimeve, IRGC u ka bërë thirrje punonjësve të 18 kompanive të ndryshme, përfshirë Apple, Google, Meta dhe NVIDIA, që të largohen menjëherë nga vendet e tyre të punës për të shpëtuar jetën. Gjithashtu, edhe banorët që jetojnë pranë objekteve të këtyre kompanive janë këshilluar të evakuohen urgjentisht. Ndër kompanitë e tjera të përmendura janë Microsoft, Oracle, Tesla, HP, Intel, Palantir, Boeing, Dell, Cisco dhe IBM.
Në deklaratën e saj, IRGC argumenton se kompanitë amerikane të teknologjisë së informacionit dhe inteligjencës artificiale luajnë rol kyç në planifikimin dhe ndjekjen e objektivave ushtarake, duke i konsideruar ato si pjesë të operacioneve që Irani i cilëson si terroriste. Për këtë arsye, organizata paralajmëroi se këto kompani do të konsiderohen objektiva të ligjshme në rast të përshkallëzimit të mëtejshëm të konfliktit. Ajo shtoi se sulmet mund të fillojnë që nga mbrëmja e së mërkurës, nëse vazhdojnë vrasjet e liderëve iranianë.
Irani kishte paralajmëruar edhe më parë se do të sulmonte kompani dhe banka të lidhura me SHBA-në dhe Izraelin, por këtë herë kërcënimi përfshinte një afat konkret. Situata është tensionuar më tej pas një sulmi të mëhershëm me dronë iranianë ndaj qendrave të të dhënave të Amazon në Bahrein dhe Emiratet e Bashkuara Arabe, i cili shkaktoi ndërprerje në shërbimet Amazon Web Services në rajon.
Ndërkohë, raportohet se SHBA ka përdorur inteligjencë artificiale të zhvilluar nga Anthropic gjatë sulmeve ajrore fillestare kundër Iranit në fund të shkurtit. Në të njëjtën kohë, Izraeli po përdor një platformë të re të inteligjencës artificiale për të monitoruar lëvizjet e zyrtarëve iranianë, duke treguar rolin gjithnjë në rritje të teknologjisë në konfliktet moderne.
Gjithashtu Ambasada Amerikane në Tiranë ka paralajmëruar se dhe në Shqipëri subjektet e lidhura me SHBA mund të shënjestrohen nga grupet e lidhura me Iranin.
“Grupet e lidhura me Iranin mund të shënjestrojnë subjekte të lidhura me Shtetet e Bashkuara ose elementë të opozitës iraniane në Shqipëri. Ata gjithashtu mund të synojnë vende të zakonshme, të tilla si vende turistike, qendra tregtare, hotele, klube dhe restorante. Ne i inkurajojmë qytetarët amerikanë të ushtrojnë vigjilencë të shtuar.” shkruhet në llogarinë zyrtare të Ambasada Amerikane në Tiranë.
