NASA ka zbuluar një listë me ushqime që astronautët do të konsumojnë gjatë misionit Artemis II, i cili do të dërgojë një ekuipazh rreth Hënës. Ndryshe nga ushqimet shumë të kufizuara të misioneve të para hapësinore, dieta e re është më e larmishme dhe më e shijshme.
Në fillimet e eksplorimit hapësinor, ushqimi ishte shumë bazik. Astronautët dhe kozmonautët konsumonin pasta në tub, kube të vogla ushqimi dhe produkte të thata që duhej të rihidratoheshin. Edhe Yuri Gagarin, njeriu i parë në hapësirë, konsumoi vetëm një pastë me mish dhe mëlçi nga një tub. Problemi kryesor ishte mungesa e pajisjeve dhe rreziku që thërrimet të lëviznin në mikrogravitet dhe të dëmtonin pajisjet.
Për misionin Artemis II, ushqimi është zgjedhur me kujdes për të qenë i qëndrueshëm për një kohë të gjatë, i sigurt dhe i lehtë për t’u konsumuar në mikrogravitet brenda anijes Orion spacecraft. Ushqimet duhet gjithashtu të prodhojnë sa më pak thërrime.
Menuja përfshin tortilla dhe bukë të sheshtë gruri, si dhe disa vakte më të pasura si barbecue beef brisket, macaroni me djathë, brokoli au gratin, fasule jeshile me erëza, quiche me perime, si dhe couscous me arra. Për mëngjes do të ketë granola me boronica dhe salsiçe. Astronautët do të kenë edhe salca të ndryshme si mustardë, mjaltë, reçel, gjalpë kikiriku dhe gjalpë bajamesh.
Për pijet, ekuipazhi mund të zgjedhë deri në dy në ditë, përfshirë kafe, çaj jeshil, smoothie mango-pjeshkë, kakao, limonadë dhe pije me luleshtrydhe.
Megjithatë, disa ushqime të thata kërkojnë ujë për t’u përgatitur, gjë që nuk është e mundur gjatë fazave si ngritja dhe ulja e anijes. Në këto momente përdoren ushqime gati për konsum. Ushqimi mund të ngrohet me një pajisje ngrohëse të vogël pasi të rihidratohet. Ndërkohë, nisja e misionit është shtyrë për shkak të një problemi me rrjedhjen e helium-it në raketë, por NASA po punon për ta zgjidhur përpara dritareve të mundshme të nisjes në prill.
