Microsoft ka zbuluar emrin e koduar të gjeneratës së re të konsolës Xbox, i cili quhet Project Helix. Lajmi u konfirmua nga drejtuesja e re e divizionit të lojërave në Microsoft, Asha Sharma, e cila mori këtë rol muajin e kaluar.
Sipas saj, Project Helix do të jetë një konsolë e gjeneratës së re që do të ofrojë performancë shumë të lartë dhe do të mund të luajë si lojëra Xbox, ashtu edhe lojëra për PC, duke e afruar më shumë konsolën me një kompjuter të fuqishëm për gaming. Ideja është që pajisja të funksionojë si një hibrid mes konsolës dhe PC-së, duke i dhënë përdoruesve më shumë fleksibilitet.
Kompania ka theksuar se projekti synon të rikthejë fokusin te identiteti tradicional i Xbox. Në një memo të brendshme, Sharma theksoi angazhimin për “rikthimin e Xbox”, duke vënë në qendër konsolën që historikisht ka qenë baza e markës. Megjithatë, ajo pranoi se sot gaming nuk kufizohet vetëm në një pajisje, pasi lojërat e Xbox janë tashmë të disponueshme edhe në platforma të tjera.
Detaje të plota për konsolën nuk janë bërë ende publike, përfshirë datën e prezantimit. Megjithatë, kompania AMD ka lënë të kuptohet më herët se teknologjia e saj mund të jetë gati për një prezantim rreth vitit 2027.
Më shumë informacione mund të zbulohen gjatë Game Developers Conference, ku drejtuesi i teknologjisë për gjeneratën e ardhshme të Xbox, Jason Ronald, do të mbajë një prezantim mbi të ardhmen e platformës.
Emri Project Helix vazhdon traditën e Microsoft për përdorimin e emrave të koduar përpara prezantimit të produkteve, siç ndodhi më parë me Project Scorpio për Xbox One X dhe Project Scarlett për Xbox Series X.
